जळगाव मिरर | १९ मे २०२५
राज्यातील सोलापुर येथील आगीची घटना ताजी असताना आता मुंबईतील विधान भवन परिसरात आज दि.१९ रोजी अचानक धुराचे साम्राज्य पहायला मिळाले. सर्वांना विधान भवनाच्या प्रवेशद्वारावर आग लागली असे वाटले. परंतू ही आग नसून विधान भवनाच्या प्रवेशद्वाराजवळ असणाऱ्या एसीमध्ये शॉर्ट सर्किट झाल्याने धुराचे लोट पसरले होते.
विधान भवनात सोमवारी काही महत्त्वाचे कार्यक्रम आयोजित करण्यात आले होते. या कार्यक्रमांसाठी मुख्यमंत्री, उपमु्ख्यमंत्री आणि आमदारही उपस्थित होते. कार्यक्रम आटोपल्यानंतर आमदारांच्या जेवणाची देखील इथे व्यवस्था केलेली होती. त्यामुळे सर्व आमदार जेवणासाठी मार्गस्थ झाले होते. या दरम्यान अचानक परिसरात धुराचे साम्राज्य पहायला मिळाले. याच वेळी विधान परिसरात बाहेरच्या दिशेला विधानसभा अध्यक्ष राहुल नार्वेकर आले. त्यांनी विधानभवनाला आग लागली नसल्याचे स्पष्ट केले.
त्यांनी दिलेल्या माहितीनूसार, विधान भवनाच्या प्रवेशद्वाराजवळ असणाऱ्या एसीमध्ये शॉर्ट सर्किट झाली. यामुळे तिथून धूर निघायला लागला. हा धूर सर्वत्र पसरायला लागला, असे त्यांनी सांगितले. धुरामुळे तातडीने प्रशासन अलर्ट झाले. प्रशासनाकडून सर्वोतोपरी काळजी घेण्यात आली. धूर बंद व्हावा यासाठी उपाययोजना करण्यात आल्या असून सुरक्षेच्या पार्श्वभूमीवर अग्निशामक दलाच्या गाड्या देखील घटनास्थळी पाचरण करण्यात आले होते.
