जळगाव मिरर । २९ नोव्हेंबर २०२५
शेडनेटच्या नावाखाली अंगठे घेऊन ७ लाख रुपयांचे कर्ज काढून नेरपाट येथील एका शेतकऱ्यांची ७ लाखात फसवणूक केल्याची घटना सन २०२० मध्ये घडली होती. या प्रकरणी पारोळा तालुक्यातील शेतकऱ्याने दिलेल्या फिर्यादीवरून दोन जणांविरुद्ध फसवणुकीचा गुन्हा दाखल करण्यात आला आहे.
सविस्तर वृत्त असे कि, पारोळा तालुक्यातील नेरपाट येथील शेतकरी मधुकर गडबड पाटील यांची अमळनेर तालुक्यातील सडावण येथे शेती आहे. सन २०२० मध्ये त्यांनी पोखरा योजनेंतर्गत अमळनेर तालुका कृषी विभागात अर्ज केला होता. त्याचवेळी एजंट समाधान पंडित शेलार त्याच्याकडे आला आणि त्याने तुमचे शेडनेट आणि कर्जही मंजूर करून देतो, असे सांगितले. त्यानंतर त्यांना युनियन बँकेत नेले. तेथे काही कागदपत्रांवर अंगठे घेतले. त्यांनतर शिंदखेडा तालुक्यातील सोनेवाडी येथील ओम अॅग्रो कंपनीच्या कामगारांनी शेडनेट साठी खांब उभारले. मात्र, शेडनेट लावलेच नाही. दरम्यान, युनियन बँकेची नोटीस आल्यानंतर मधुकर पाटील यांना त्यांच्या शेतजमिनीवर बोजा टाकून ७लाखांचे कर्ज घेतल्याचे कळाले. तर या कर्जावरील व्याज मिळून ११ लाख रुपये झाल्याचे स्पष्ट झाले.
तर त्यांच्या खात्यावरील ही कर्जाची रक्कम ओम अॅग्रो सर्व्हिसेस यांच्या खात्यावर १८ फेब्रुवारी २०२० मध्ये वळती झाली होती. तर, ओम अॅग्रोचे मालक उद्धव कुवर आणि समाधान शेलार यांचे आर्थिक व्यवहार झाल्याचे समजले. या दोघांनी शेतकऱ्यांची फसवणूक केल्याची फिर्याद अमळनेर पोलीस ठाण्यात ५ वर्षानंतर देण्यात आली आहे. त्यानुसार समाधान शेलार आणि उद्धव कुवर यांच्याविरुद्ध विविध कलमान्वये गुन्हा दाखल करण्यात आला आहे. तपास पोलीस उपनिरीक्षक रामकृष्ण कुमावत करत आहेत.
