जळगाव मिरर | ९ मे २०२४
आपल्या दोन मुलींना विषारी औषध देऊन मातेने राहत्या इमारतीच्या चौथ्या मजल्यावरून उडी घेत जीवन संपवल्याची धक्कादायक घटना बुधवारी सकाळी पंचवटी येथे घटना उघडकीस आली. आत्महत्येपूर्वी या विवाहितेने दोन व्हिडीओ तयार केले असून, एक चिठ्ठीदेखील लिहून ठेवली आहे. पती आणि सासरच्या जाचाला कंटाळून हे पाऊल उचलत असल्याचे तिने या चिठ्ठीत म्हटले आहे.
मिळालेल्या माहितीनुसार, अश्विनी स्वप्निल निकुंभ (३९, रा. हरिवंदन अपार्टमेंट, फ्लॅट नं. १३, इच्छामणी नगर, कोणार्क नगर, पंचवटी) असे आत्महत्या केलेल्या विवाहितेचे नाव आहे. अश्विनी निकुंभ यांनी बुधवारी सकाळी आपल्या आराध्या (८) व अगस्त्या (२) या दोन मुलींना विषारी औषध पाजले. मुलींनी जगाचा निरोप घेतल्याची खात्री झाल्यानंतर अश्विनी यांनी राहत्या इमारतीच्या चौथ्या मजल्यावरून उडी घेत स्वतःच्या जीवनाचा अंत केला. घटनेची माहिती मिळताच आडगाव पोलिसांनी घटनास्थळी धाव घेतली. पंचनामा करून तीनही मृतदेह जिल्हा शासकीय रुग्णालयात उत्तरीय कार्यासाठी पाठवण्यात आले. याप्रकरणी रात्री उशिरापर्यंत आडगाव पोलीस ठाण्यात गुन्हा दाखल करण्याचे काम सुरू होते.
