जळगाव मिरर | २९ मार्च २०२५
राज्यातील गुन्हेगारीत पुणे शहर आता अव्वल येत असतांना एक खळबळजनक घटना उघडकीस आली आहे. कौटुंबिक वादातून पतीने पत्नीचा चाकूने सपासप वार करत खून केला. तिचा मृतदेह घरातच सुटकेसमध्ये भरून ठेवला. त्यानंतर मुंबईकडे जात असताना त्याने शिरवळ परिसरात विष प्राशन केले. त्याला उपचारासाठी सुरुवातीला स्थानिक रुग्णालयात दाखल करण्यात आले. तेथे उपस्थित असलेल्या पोलिस कर्मचार्याला ही माहिती मिळाली. त्या वेळी बंगळुरूमधील ‘मर्डर मिस्ट्री’चा हा भयानक थरार पुढे आले.
मिळालेल्या माहितीनुसार, राकेश राजेंद्र खेडेकर (वय 35, जोगेश्वरी, मुंबई) असे आरोपी पतीचे नाव असून, त्याने पत्नी गौरी (वय 32) हिचा खून केला आहे. राकेश याच्यावर सध्या पुण्यातील ससून रुग्णालयात उपचार सुरू आहेत. कर्नाटक पोलिसदेखील त्याच्या मागावर होते. तो शिरवळ पोलिसांच्या हाती लागल्याची माहिती मिळताच, त्यांनी पुण्याकडे धाव घेतली.
शिरवळ पोलिसांनी दिलेल्या माहितीनुसार, आरोपी राकेश हा फेब—ुवारी महिन्यात पत्नी गौरी हिच्यासह बनारगट्टा तेजस्विनीनगर बंगळुरू येथे नोकरीच्या निमित्ताने वास्तव्यास आला. तो वर्क फ्रॉम होम करत होता. तर गौरी नोकरीच्या शोधात होती. 26 मार्च रोजी रात्री गौरीने परत मुंबईला जाण्याचा आग्रह धरला. त्या कारणातून दोघांत वाद झाला. गौरी घरातील भांडी आदळू लागली. राकेश याने तिला समजावून सांगण्याचा प्रयत्न केला. गौरीने घरातील चाकू घेऊन राकेशला मारण्याची भीती दाखवली. त्याचा राग राकेशला आला. त्याने गौरीच्या हातातील चाकू घेऊन तिच्या मानेवर, गळ्यावर आणि पाठीवर चाकूने सपासप वार केले. रक्ताच्या थारोळ्यात गौरी घराच्या लॉबीत पडली. तिचा मृत्यू झाल्याचे समजताच राकेश याने घरातील मोठी बॅग रिकामी करून तिचा मृतदेह त्यामध्ये ठेवला. त्यानंतर ती बॅग बाथरूमच्या बाहेर ठेवून दिली.
27 मार्च रोजी रात्री बाराच्या सुमारास त्याने कारमधून बंगळुरूमधून मुंबईच्या दिशेने पळ काढला. पोलिस आपल्याला पकडतील याची त्याला भीती होती. महाराष्ट्रातील कागल गावी आल्यानंतर त्याने एका मेडिकलच्या दुकानातून फिनाइल आणि झुरळ मारण्याचे औषध विकत घेतले. प्रवासातच त्याने बंगळुरू येथे तो राहत असलेल्या इमारतीतील एका व्यक्तीला गौरीचा खून केल्याची माहिती दिली. तिचा मृतदेह बॅगेत ठेवल्याचे सांगितले. खंडाळा घाट उतरल्यानंतर राकेश याने शिरवळ परिसरात विष (कीटकनाशक) प्राशन केले.
विष प्राशन केल्यानंतर त्रास होऊ लागल्याने राकेश रस्त्याच्या कडेला बसला होता. एका दुचाकीचालकाचे त्याच्याकडे लक्ष गेले. त्या वेळी त्याने विष प्राशन केल्याचे सांगितले. राकेशला स्थानिक रुग्णालयात उपचारासाठी दाखल करण्यात आले. शिरवळ पोलिस ठाण्याचे हवालदार कुंभार तेथे अगोदरच हजर होते. त्यांनी माहिती घेतली असता, राकेश याने पत्नी गौरीचा खून केल्याचे सांगितले.
