जळगाव मिरर | २ नोव्हेबर २०२३
महाराष्ट्र अंधश्रद्धा निर्मूलन समिती जळगाव शहर शाखेमार्फत डॉ नरेंद्र दाभोलकर यांच्या जयंतीनिमित्त १ नोव्हेंबर हा दिवस विवेक जागर दिन साजरा करण्यात आला. सदर कार्यक्रम डॉ.प्रदीप जोशी यांच्या दवाखान्यात आयोजित करण्यात आला होता. या दिनानिमित्त समाजात विवेकी विचार पेरण्यासाठी समविचारी संघटनांचा सन्मान करण्यात आला. यामध्ये मराठी विज्ञान परिषदेचे सचिव प्रा.दिलीप भारंबे, बार्टीचे समतादूत युनुस तडवी, भारतीय बौद्ध महासभा जिल्हा सरचिटणीस व अंनिस कार्यकर्ता प्रा. आनंद ढिवरे यांचा यथोचित सन्मान विवेकी पुस्तक देऊन डॉ प्रदीप जोशी राज्य कार्यवाह मानसिक आरोग्य विभाग व दिगंबर कट्यारे राज्य कार्यवाह वैज्ञानिक जाणीवा शिक्षण प्रकल्प विभाग यांच्या हस्ते करण्यात आला. सत्कारार्थी दिलीप भारंबे, युनुस तडवी, आनंद ढिवरे यांनी मनोगत व्यक्त करून झालेल्या सन्मानाच्या बद्दल अंनिसचे आभार मानले.
दिगंबर कट्यारे सर यांनी आपले मनोगत व्यक्त करताना सांगितले की, समविचारी संघटना देखील असेच सप्रयोग व्याख्यान आयोजित करतात, म्हणूनच अशा कार्यकर्त्यांचा सन्मान करण्यात आला. जणू विवेकी पालकत्व आता सर्वोच्च पातळीवर पोहचले आहे की काय असे वाटते, असे सरांनी सांगितले. अध्यक्षीय समारोप प्रसंगी डॉ प्रदीप जोशी यांनी आपल्या मनोगतात सांगितले की, डॉ नरेंद्र दाभोलकर यांनी आपलं संपूर्ण आयुष्य समाजात विवेकी विचार पेरण्यासाठी खर्च केले. तेच विचार अंनिसचे कार्यकर्ते समाजात वावरतांना सप्रयोग व्याख्यान देऊन प्रबोधन करीत असतात. सदर कार्यक्रम प्रसंगी जळगाव शहर शाखेचे कार्याध्यक्ष कल्पना चौधरी, प्रधान सचिव गुरूप्रसाद पाटील, जितेंद्र धनगर, आर.ए.पाटील सर, वसंत सोनवणे सर, शिरीष चौधरी, सुभाष सपकाळे, एडवोकेट भरत गुजर, आदी उपस्थित होते. सौ. कल्पना चौधरी त्यांनी कार्यक्रम प्रसंगी विचार मांडले तर जितेंद्र धनगर यांनी आभार मानले.