जळगाव मिरर | ८ डिसेंबर २०२५
अमळनेर तालूक्यातील जळोद रस्त्यावर आर्मी स्कूलजवळ २४ नोव्हेंबर रोजी दुपारी जावयाने सासूवर हल्ला करून तिच्या कानातील व गळ्यातील सोन्याचे दागिने हिसकावल्याची धक्कादायक घटना घडली. उपचारानंतर पीडितेने दिलेल्या फिर्यादीवरून अमळनेर पोलिसांनी जावयाविरुद्ध गुन्हा नोंदविला आहे.
सविस्तर वृत्त असे कि, अंबापिंप्री (ता. पारोळा) येथील मीनाबाई समाधान कोळी या पीडित तर विनोद कोळी हा आरोपी जावई आहे. पत्नीने तीन वर्षांपूर्वी आत्महत्या केली असून त्यानंतर दुसरे लग्न केले असले तरीही विनोद हा मीनाबाई यांच्या सासरीच राहत होता.
मीनाबाई यांचा मुलगा भरत व जावई विनोद यांच्यात वाद झाला होता. हा वाद मिटविण्यासाठी २४ नोव्हेंबरला विनोदने फोन करून मीनाबाईला अमळनेर शहरातील पैलाड भागात बोलावले. त्या आल्यावर त्याने त्यांना जळोद रस्त्यावरील आर्मी स्कूलच्या पुढील खदानीजवळ नेले व त्याठिकाणी मारहाण करून त्यांनी घातलेले दागिने हिसकावले. या मारहाणीमध्ये मीनाबाई बेशुद्ध पडल्या. नंतर प्रवाशांच्या मदतीने त्या अमळनेरमध्ये आल्या व उपचार घेतल्यानंतर पोलिसांकडे फिर्याद नोंदविली. विनोदने एकूण ५० हजार रुपये किमतीचे सोन्याचे दागिने ओरबाडून नेल्याचे फिर्यादीत नमूद आहे. अमळनेर पोलिसांनी या प्रकरणी विनोद कोळी याच्याविरुद्ध गुन्हा दाखल केला असून पुढील तपास सुरू आहे.
