जळगाव मिरर | २९ ऑगस्ट २०२३
जळगाव शहरातील शाहू नगरात दोन गटात वाद होऊन दगडफेक झाल्याची घटना रविवारी रात्री घडली असून या घटनेत चार जण गंभीर जखमी झाले असून त्यांच्यावर रुग्णालयात उपचार सुरू आहे. याप्रकरणी सात जणांविरुद्ध शहर पोलिस ठाण्यात गुन्हा दाखल करण्यात आला. सासरी पत्नी व मुलांना घेण्यासाठी आलेल्यांसोबतच पैशावरून हा वाद झाला व त्यांच्यावर दगडफेक झाली.
मिळालेल्या माहितीनुसार, चाळीसगाव येथील यासीन नगरातील रहिवासी परवेझ शेख सईद हे बांधकाम ठेकेदार इद्रीस शेख इकबाल यांच्याकडे मिस्तरी काम करीत होते. ठेकेदाराकडून कामासाठी आगाऊ उचल म्हणून परवेझ यांनी ४० हजार रुपये घेतले होते. त्यापैकी २५ हजार रुपये त्यांना परत दिले होते. रविवारी रात्री दहा वाजेच्या सुमारास ते शाहू नगरातील एका पान सेंटरजवळ राहणारे त्यांचे मामा शेख चाँद शेख सुपडू यांच्याकडे आलेले असताना ठेकेदार इद्रीस शेख इक्बाल व त्यांच्यासोबत अन्य काही जण तेथे आले व त्यांनी पैशांची मागणी केली. यावरून वाद झाला. यादरम्यान परवेझ यांच्या मामाचा मुलगा फारुख शेख भिकन व अन्य जण तेथे आले. ते इद्रीस यांच्यासह त्यांच्या सोबतच्यांना समजावीत असताना त्यांनी दगडफेक केली. या दगडफेकीत अस्लम शेख भिकन यांच्या डोक्याला व हाताला, मुस्तकीम शेख मुक्तार याच्या नाकाला फारुख शेख भिकन याच्या डोळ्याला तर मुक्तार शेख सुपडू यांच्या पायाला गंभीर दुखापत झाली. या प्रकरणी परवेझ शेख यांनी दिलेल्या फिर्यादीवरून इद्रीस शेख इक्बाल (रा. पिंप्राळा हुडको) यांच्यासह सात जणांविरुद्ध शहर पोलिस ठाण्यात गुन्हा दाखल करण्यात आला.
