जळगाव मिरर | ९ जुलै २०२४
देशातील अनेक राज्यात पावसाचा जोरदार कहर सुरु असतांना अपघाताच्या देखील घटना घडत असतांना नुकतेच गुजरातमधल्या डांग जिल्ह्यात सातपुरा घाटात रविवारी सायंकाळी पर्यटकांच्या बसचा भीषण अपघात झाला. लक्झरी बस दरीत कोसळून झालेल्या अपघातात दोन लहान चिमुकल्यांचा मृत्यू झाला. या बस अपघाताचा लाइव्ह व्हिडिओ आता समोर आला आहे. ट्रकला ओव्हरटेक करण्याच्या प्रयत्नात बस चालकाचं नियंत्रण सुटून हा अपघात झाला.
पर्यटकांची बस रविवारी पहाटे सूरत चौक बाजारातून सापुतारा या पर्यटनस्थळी गेली होती. सांयकाळच्या सुमारास ही बस सापुतारा पर्यटन स्थळावरून परतत असताना हा अपघात झाला. सापुतारा-मालेगाम राष्ट्रीय महामार्गाच्या घाटावरून ही बस दरीत कोसळली. या अपघातामुळे प्रवाशांमध्ये प्रचंड गोंधळ निर्माण झाला होता. तसेच महामार्गावर देखील वाहतूक कोंडी झाली होती. या अपघातात दोन मुलांचा मृत्यू झाल्याचे सांगितले जात आहे. तर 5 जण जखमी झाले आहेत. अपघातस्थळी स्थानिकांनी मोठ्या प्रमाणात गर्दी केली होती.
पर्यटकांना घेऊन आलेली बस परत जात असताना घाटात एका वळणावर कोसळली. ट्रकला ओव्हरटेक करत असताना समोरून टेम्पो आला. त्या टेम्पोला वाचवण्याच्या प्रयत्नात बस दरीत गेली. या अपघातात 8 वर्षीय मुलगा आणि एका 10 वर्षांच्या मुलीचा मृत्यू झाला आहे. अपघातानंतर घटनास्थळा सातपुरा पोलीस आणि रुग्णवाहिका तातडीने दाखल झाले. त्यांनी जखमींना रुग्णालयात दाखल केलं. अपघातात पाच प्रवासी गंभीर जखमी झाले असून त्यांच्यावर उपचार सुरू आहेत.
