जळगाव मिरर / २४ मार्च २०२३ ।
जिल्ह्यात गेल्या आठवड्यापासून खुनाची मालिका सुरूच आहे. एरंडोल तालुक्यात वाळूमाफियांनी एका तरुणाचा खून केल्यानंतर जामनेर तालुक्यात मित्रानेच मित्राचा खून केल्याची घटना ताजी असतांना यावल तालुक्यात आज सकाळी वृद्धाचा खून केल्याची घटना उघकीस आल्याने पुन्हा एकदा जिल्हा हादरलं आहे.
यावल तालुक्यातील किनगाव येथील इंदिरानगर परिसरतील रहिवाशी ६० वर्षीय वृद्धाची गळा चिरून निर्घृण हत्या झाल्याची बाब शुक्रवारी सकाळी उघडकीस आली आहे. चुंचाळेकडे जाणार्या रस्त्यावर एका नाल्याच्या पुलाखाली शुक्रवारी सकाळी त्यांचा मृतदेह आढळून आला असून घटनास्थळी पोलिसांचे पथक दाखल झाले आहे.
मिळालेली माहिती अशी कि, किनगाव येथील इंदिरानगर भागातील रहिवासी भीमराव सोनवणे (60) हे व्यवसायाने ट्रक चालक होता व रात्री घरी आलेले नव्हते. शुक्रवारी सकाळी इंदिरानगर वस्तीच्या पुढील चुंचाळे रस्त्यावरील नाल्याच्या पुलाच्या खाली त्यांचा गळा कापलेला अवस्थेत मृतदेह शेतमजुरांना दिसून आला आणि एकच खळबळ उडाली. मजुरांना गावात माहिती दिल्यानंतर यावल पोलिसांना माहिती देण्यात आली. घटनास्थळी यावल पोलीस ठाण्याचे पोलीस निरीक्षक राकेश मानगावकर, पोलिस उपनिरीक्षक सुनील मोरे, सहाय्यक फौजदार मुजफ्फर खान, असलम खान, भुषण चव्हाण हे पथकासह दाखल झाले. मयताच्या पश्चात मुलगा, मुलगी, सून नातवंडे असा परीवार आहे. खूनाचे कारण अद्याप अस्पष्ट आहे.
