जळगाव मिरर । ११ जानेवारी २०२३ ।
शिवाजीनगर उड्डाणपुलाजवळ तरुणाला लुटल्याप्रकरणी शहर पोलिसांनी एकाला कानळदा परिसरातून अटक केली असून तर एका अल्पवयीन मुलाला ताब्यात घेतले आहे. त्यांच्याकडून गुन्ह्यात वापरलेली दुचाकी आणि चोरलेला महागडा मोबाईल पोलिसांनी हस्तगत केला आहे.
शिवाजी नगरातील रहिवासी सचिन अहिरे हा २१ नोव्हेंबर २०२२ रोजी रात्री ११ वाजता शिवाजीनगर उड्डाणपुलाजवळून जात होता. त्यावेळी दुचाकीवरून आलेल्या तिघांनी अहिरे याच्या खिशातून १७ हजाराची रोकड आणि दोन मोबाईल बळजबरीने हिसकावून पळ काढला होता. याप्रकरणी दुसऱ्या दिवशी अहिरे याच्या फिर्यादीवरून शहर पोलिस ठाण्यात गुन्हा दाखल झाला होता. हा गुन्हा घडल्यानंतर शहर पोलिसांनी शिवाजीनगर उड्डाणपूल परिसरातील सीसीटीव्ही फुटेज तपासले होते. एका सीसीटीव्हीच्या फुटेजमध्ये लुटमार करणारे तिघे कैद झाले होते. त्या आधारावर पोलिसांनी तिघांचा शोध सुरु केला होता. अखेर सोमवारी रात्री संशयित सागर विजय वाघ (१९, रा. गेंदालाल मिल) हा कानळदा परिसरामध्ये असल्याची माहिती पोलिसांना मिळाली.
पोलिसांनी लागलीच सागर याला कानळदा परिसरातून अटक केली. त्याशिवाय त्याच्या अल्पवयीन साथीदाराला सुध्दा ताब्यात घेतले. सागर याला मंगळवारी न्यायालयात हजर केले असता, त्याला तीन दिवसांची पोलिस कोठडी सुनावली आहे. तर अल्पवयीन मुलाला बालसुधारगृहात पाठविण्यात आले आहे. ही कारवाई पोलिस उपनिरीक्षक दत्तात्रय पोटे, विजय निकुंभ, प्रफुल्ल धांडे, तेजस मराठे, रतन गिते, राजकुमार चव्हाण, भास्कर ठाकरे आदींनी केली आहे.
