जळगाव मिरर | २२ एप्रिल २०२५
राज्यातील मुख्यमंत्री माझी लाडकी बहीण योजनेच्या एप्रिल महिन्याचे पैसे अद्यापही सरकारकडून देण्यात आलेले नाही. त्यामुळे एप्रिलचा सातवा हप्ता कधी जमा होणार याची महिलांना प्रतिक्षा आहे. यासंदर्भात महिला आणि बालविकास मंत्री आदिती तटकरे यांनी महत्त्वाची माहिती दिली.
माध्यमांशी संवाद साधताना महिला आणि बालविकास मंत्री आदिती तटकरे म्हणाल्या की, “एप्रिल महिना संपण्याच्या आधी पात्र महिलांच्या खात्यात मुख्यमंत्री माझी लाडकी बहीण योजनेचा लाभ वितरीत केला जाणार आहे.” यावेळी आदिती तटकरे यांनी यासंदर्भात कोणतीही थेट तारीख दिली नाही. तर काही वृत्तांनुसार, ३० एप्रिलला अक्षय तृतीयेला हा निधी वितरीत केला जाणार आहे.
या योजनेतील पात्र महिलांच्या अर्जांच्या छाननी प्रक्रियेविषयी विचारण्यात आलं. तेव्हा आदिती तटकरे म्हणाल्या, “सुरुवातीपासून या योजनेसंदर्भात फार गैरसमज पसरवले गेले आहेत. मुख्यमंत्री माझी लाडकी बहीण योजनेत कोणताही बदल करण्यात आलेला नाही. ज्या महिलांच्या कुटुंबाचं उत्पन्न अडीच लाखांपेक्षा कमी असेल त्यांनाच निधी दिला जातो, त्यात नवीन काही नाही. लाडकी बहीण योजनेचा शासननिर्णयात हेच नमूद आहे. याशिवाय ज्या महिला इतर सरकारी योजनांचा लाभ घेत आहेत, संजय गांधी निराधार योजनेतून घेत असतील, तर त्यांना त्या योजनेचे १५०० रुपये मिळत आहेत. त्यामुळे त्या लाडकी बहीण योजनेसाठी पात्र नाहीत. ज्या महिला नमो शेतकरी योजनेचा लाभ घेत आहेत, त्यांना १००० रुपये मिळत नमो शेतकरी योजनेतील मिळतील आणि तर ५०० रुपये लाडकी बहीण योजनेमधून मिळतील. हेच मूळ शासन निर्णयातही म्हटले आहे,” असेही आदिती तटकरे यांनी स्पष्ट केले.
