जळगाव मिरर | २ जानेवारी २०२५
जिल्हापेठ पोलिस ठाण्याच्या हद्दीत बेकायदेशीर कामांकडे पोलिस निरीक्षकांचे दुर्लक्ष असून ते सामान्य नागरिकांना त्रास देत असल्याची तक्रार पोलिस अधीक्षकांकडे करण्यात आली आहे. यामध्ये पोलिस ठाण्यात कामानिमित्त गेलेल्या प्रवीण अशोक महाजन (वय ३३, रा. गणेश कॉलनी) यांना शिवीगाळ करीत मारहाण करीत पोलिस ठाण्यात डांबून ठेवले होते. त्यामुळे त्यांच्यावर कारवाई करण्याची मागणी निवेदनाद्वारे केली आहे.
मिळालेल्या माहितीनुसार, भाजपाचे जळगाव ग्रामीण विधानसभा निवडणूक प्रमुख चंद्रशेखर अत्तरदे, मारहाण झालेले प्रवीण महाजन यांनी पोलिस अधीक्षकांना वेगवेगळे निवेदन दिले आहे. यामध्ये त्यांनी जिल्हा पेठ पोलिस ठाण्याच्या हद्दीत शाळा, महाविद्यालय परिसरात टवाळखोर मुले विद्यार्थ्यांना मादक पदार्थ देवून त्यांना व्यसनाधीन बनवित आहे. तसेच भजे गल्लीमध्ये हॉटेलमध्ये अवैधरित्या दारु विक्री, कोठे-कुंटणखाने सुरू आहे. मात्र याकडे पोलिस निरीक्षकांचे दुर्लक्ष असून ते सामान्य नागरिकांना त्रास दिल्याचा आरोप त्यांनी निवेदनामध्ये केला आहे. त्यामुळे त्यांची उचलबांगडी करण्यात यावी, अन्यथा दि. ४ जानेवारी रोजी पोलिस अधीक्षक कार्यालयासमोर उपोषण करण्याचा इशारा देण्यात आला आहे.
दुसऱ्या एका निवेदनाद्वारे प्रवीण अशोक महाजन यांनी दिलेल्या निवेदनात म्हटले आहे की, ते दि. ३१ डिसेंबर रोजी जिल्हापेठ पोलिस ठाण्यात कामानिमित्त गेले व पोलिस निरीक्षक राजेश मानगावकर यांना कॉल केला असता त्यांनी शिवीगाळ केली. तसेच पोलिस ठाण्याच्या हद्दीत मारहाण करीत तीन तास डांबून ठेवल्याचा आरोप महाजन यांनी केला आहे. त्यामुळे त्यांच्यावर कारवाईची मागणी त्यांनी केली आहे. तसेच अत्तरदे यांनीदेखील याविषयी निवेदन दिले आहे.
