भडगाव : प्रतिनिधी
तालुकयातील कजगाव परिसरातील चार वेगगवेग्ळ्या गावातून एकाच मध्यरात्री १२ जनावरे चोरी झाल्याने परिसरातील शेतकरी भयभीत झाले आहे. या प्रकरणी भडगाव पोलिस ठाण्यात संबंधित शेतकऱ्यांनी गुन्हा दाखल केला आहे. आता मात्र पोलीस प्रशासना समोर या चोरट्याने पकडण्याचे मोठे आव्हान उभे ठाकले आहे.
सविस्तर वृत्त असे की, कजगाव परिसरातील लोणपिराचे, बोदर्डे, कोठली व निंभोरा या चारही गावातून एकाच रात्री तब्बल बारा जनावरे चोरीस गेली. लोण येथील गावाला लागूनच असलेल्या शेडमधून व मोकळ्या जागी बांधलेली जनावरे वाहनात टाकून भामटे पसार झाल्याचा अंदाज लोण ग्रामस्थांनी व्यक्त केला आहे.
रामकृष्ण मांगो पाटील यांची ८० हजार रुपये किमतीची बैलजोडी व ३० हजार रुपये किमतीची गाय चोरून नेली आहे तर रघुनाथ शायसिंग पाटील यांची एक गाय व दोन वासरे असे तीन जनावरे अंदाजे १ लाख रुपये किमतीचे पशुधन तेथून चोरी झाले आहेत. तर बोदर्डे येथील सुनील प्रल्हाद पाटील यांचेही एक पशुधन व कोठली येथील भिकन संतोष पाटील या शेतकऱ्यांचे तीन पशु तसेच निंभोरा येथील माधवराव लुडू पाटील या शेतकऱ्याची दोन जनावरे असे चार गावातून तब्बल बारा पशुधन चोरी झाले आहेत.
चारही गावातील शेतकऱ्यांचे मिळून तब्बल ४ ते ५ लाख रुपये किमतीचे पशुधन चोरी झाल्याच्या घटनेने पशुपालकांमध्ये प्रचंड भीतीचे वातावरण निर्माण झाले आहे. या प्रकरणी भडगाव पोलिस ठाण्यात गुन्हा दाखल केला असून, सहाय्यक फौजदार छबुलाल नागरे, पोलिस कर्मचारी प्रकाश गवळी यांनी घटनास्थळाचा पंचनामा केला आहे. भडगाव पोलिस निरीक्षक अशोक उतेकर यांच्या मार्गदर्शनाखाली साहाय्यक फौजदार छबुलाल नागरे, पोलिस कर्मचारी नरेंद्र विसपुते, प्रकाश गवळी तपास करीत आहेत, तसेच पोलिस प्रशासनाच्या वतीने पशुपालकांना जनावरे रस्त्याच्या कडेला न बांधता ती सुरक्षित ठिकाणी बांधावी तसेच आपल्या पशुधनाकडे लक्ष ठेवावे, असे आवाहन पोलिसांनी केले आहे.
