जळगाव मिरर । २८ ऑक्टोबर २०२५
जळगाव शहरातील चोरट्यांची हिम्मत वाढली चोरट्यांनी आता थेट राष्ट्रवादी काँग्रेसचे नेते एकनाथ खडसे यांच्या ‘मुक्ताई’ बंगल्यात चोरी केली आहे. या घटनेमुळे एकच खळबळ उडाली आहे.
मिळालेल्या माहितीनुसार, शहरातील शिवराम नगर येथील माजी मंत्री आ.एकनाथ खडसे यांच्या निवासस्थानी चोरी झाल्याने राजकीय नेत्यांची घरेही सुरक्षित नसल्याचे दिसून येत आहे. एकनाथ खडसे हे बहुतांशी मुक्ताई नगर येथे वास्तव्यास असल्याने जळगावमधील शिवराम नगर येथील ‘मुक्ताई’ बंगल्याला कुलूप लावलेले होते. आज सकाळी खडसे यांच्याकडील कर्मचारी नेहमीप्रमाणे बंगल्यावर आले असता, त्यांना घराच्या दाराचे कुलूप तुटलेले दिसले. त्यांनी घरात प्रवेश करून पाहणी केली असता, घरातील सामान अस्ताव्यस्त फेकलेले आढळले, ज्यामुळे घरात चोरी झाल्याचे स्पष्ट झाले.
घडलेल्या प्रकाराची माहिती तात्काळ एकनाथ खडसे यांना देण्यात आली, त्यानंतर त्यांनी पोलिसांना संपर्क साधून घटनेची माहिती दिली. घटनेची माहिती मिळताच पोलिसांनी तातडीने मुक्ताई बंगल्याकडे धाव घेतली असून, पंचनामा करण्याची आणि तपास करण्याची प्रक्रिया सुरू केली आहे. एका प्रमुख राजकीय नेत्याच्या निवासस्थानी चोरी झाल्याने जळगाव शहराच्या कायदा व सुव्यवस्थेवर प्रश्नचिन्ह निर्माण झाले आहे. या चोरीत नेमके किती नुकसान झाले आहे किंवा कोणकोणत्या वस्तू चोरीला गेल्या आहेत, याची नेमकी माहिती पोलिसांच्या तपासानंतरच समोर येईल. पोलीस परिसरातील सीसीटीव्ही फुटेज तपासून चोरांचा माग काढण्याचा प्रयत्न करत आहेत.
