जळगाव मिरर | ४ एप्रिल २०२४
राज्यातील अनेक शहरात प्रेम प्रकरणाच्या माध्यमातून गुन्हेगारी घटना सातत्याने घडत असतांना एक धक्कादायक घटना सातपूर शहरात घडली होती. एकाच मुलीवर दोन मित्रांचे प्रेम जडले. मात्र, मुलगी एकासोबत फोनवर बोलत व दुसऱ्याकडे दुर्लक्ष करीत असल्याने मित्रांमध्ये खटके उडाले आणि त्यातून एकाने दुसऱ्या मित्राचा खून केल्याचे उघडकीस आले आहे. याप्रकरणी सातपूर पोलिसांनी दोन संशयितांना अटक केली आहे.
सातपूर, कामगारनगर परिसरात तीन दिवसांपूर्वी हॉटेल कामगाराचा गळा चिरून खून झाला होता. नेपाळस्थित असलेल्या मुलीच्या प्रेमप्रकरणातून हॉटेलमध्ये काम करणाऱ्या मित्रानेच हा खून केल्याचे पोलीस तपासात निष्पन्न झाले आहे. याप्रकरणी खून करणाऱ्या मुख्य संशयितासह त्यास मदत करणाऱ्या मित्राला बेड्या ठोकण्यात आल्या आहेत. संशयितांना बुधवारी (दि. ३) न्यायालयात हजर केले असता, त्यांना शनिवार (दि. ६) पर्यंत पोलीस कोठडी सुनावण्यात आली असल्याची माहिती पोलीस उपायुक्त मोनिका राऊत यांनी पत्रकार परिषदेत दिली.
ईश्वर शेर सार्की (वय २०) व प्रकाश गोविंदबहादूर शेटी (वय ४२ दोघेही मूळ रा. नेपाळ) अशी अटक करण्यात आलेल्या संशयितांची नावे आहेत. कामगारनगर रिलायन्स पेट्रोल पंपाशेजारील कौशल्य व्हिला इमारतीच्या गच्चीवर रविवारी (दि. ३१) रात्रीच्या सुमारास महेंद्र सार्की (वय २२, मूळ रा. नेपाळ) या हॉटेल कामगाराची गळा चिरून हत्या करण्यात आली होती. पोलीस उपायुक्त मोनिका राऊत यांनी सातपूर पोलीस ठाण्यात तळ ठोकत तपासचक्रे गतिमान केली. सातपूर पोलीस व स्थानिक गुन्हे शोध पथकाच्या कर्मचाऱ्यांनी ४८ तासांच्या आत काही संशयितांना ताब्यात घेतले. पोलिसी खाक्या दाखवताच संशयित ईश्वर व प्रकाश यांनी खुनाची कबुली दिली. नेपाळस्थित असलेल्या एका तरुणीशी महेंद्रचे प्रेमप्रकरण सुरू होते. महेंद्र त्या मुलीसोबत तासन्तास बोलत असे. त्यातच ईश्वरचेही त्या मुलीवर प्रेम जडले. तिच्यासोबत ईश्वरने अनेकदा फोनद्वारे बोलण्याचा प्रयत्न केला होता. मात्र, त्याला प्रतिसाद मिळत नव्हता. महेंद्र नेहमी तिच्याशी बोलत असल्याचे ईश्वरला खटकत होते.
अखेर ईश्वरने महेंद्रचा काटा काढण्याचे ठरविले. नेहमीप्रमाणे महेंद्र मुलीसोबत गच्चीवर बोलत असल्याचे बघून संशयित ईश्वरने त्याची गळा चिरून हत्या केली. यासाठी त्याला संशयित प्रकाश शेट्टी यांने मदत केली. दोघांवरही खुनाचा गुन्हा दाखल करण्यात आला आहे. संशयितांना अटक करण्याची कारवाई पोलीस आयुक्त संदीप कर्णिक, पोलीस उपायुक्त मोनिका राऊत, सहायक पोलीस आयुक्त शेखर देशमुख यांच्या मार्गदर्शनाखाली वरिष्ठ पोलीस निरीक्षक सोहन माछरे, गुन्हे शाखा युनिट १ व २ चे अधिकारी व कर्मचाऱ्यांनी केली.
