जळगाव मिरर | १४ मे २०२४
चाळीसगाव येथे मतदान केंद्रावर ड्युटीसाठी गेलेल्या महापा-लिकेतल्या वसुली विभागातील कर्मचारी संजय भगवान चौधरी (वय ५३, रा. जोशीपेठ) यांचा हृदयविकाराच्या झटक्याने मृत्यू झाला. ही दुर्देवी घटना सोमवारी पहाटेच्या सुमारास उघडकीस आली. मतदान केंद्रावर कर्तव्य बजावतांना ही दुसरी घटना असल्याने सर्वत्र हळहळ व्यक्त केली जात आहे.
सविस्तर वृत्त असे कि, शहरातील जोशीपेठेत संजय भगवान चौधरी हे कुटुंबियांसह वास्तव्यास असून ते महापालिकेतील वसुली विभागात कार्यरत होते. लोकसभा निवडणुकीच्या पार्श्वभूमीवर त्यांना चाळीसगाव येथे ड्युटी लावली होती. त्यामुळे चौधरी हे रविवारी सकाळी निवडणुकीचे साहित्य घेवून चाळीसगाव येथे गेले होते. चाळीसगावातील केंद्र क्रमांक १९१ येथे तेहजीब उर्दू प्रायमरी स्कुल येथील मतदान केंद्रावर त्यांची ड्युटी लावण्यात आली होती.
मतदान केंद्रावर पोहचल्यानंतर चौधरी यांनी तेथील कर्मचाऱ्यांसोबत जेवण केले. त्यानंतर ते झोपण्यासाठी गेले असता, त्यांना अस्वस्थ वाटू लागले. त्यांनी आपल्या सहकाऱ्यांना याबाबतची माहिती दिली. परंतु हृदयविकाराच्या झटक्याने पहाटेच्या सुमारास चौधरी यांची प्राणज्योत मालवली. संजय चौधरी हे कुठलीही हालचाल करीत नसल्याने त्यांच्यासोबत असलेल्या कर्मचाऱ्यांच्या लक्षात आले. त्यांनी लागलीच घटनेची माहिती पोलिसांना दिली. त्यानुसार त्यांना तात्काळ पोलिसांच्या मदतीने चाळीसगाव उपजिल्हा रुग्णालयात दाखल करण्यात आले. याठिकाणी वैद्यकीय अधिकाऱ्यांनी त्यांची तपासणी करीत मयत घोषीत केले.
पहाटेच्या सुमारास चौधरी यांचा मृत्यू झाल्याचे वैद्यकीय अधिकाऱ्यांनी घोषीत केल्यानंतर त्यांच्या मृतदेहाचे शवविच्छेदन करण्यात आले. त्यानंतर संजय चौधरी यांचा मृतदेह दुपारी बारा वाजेच्या सुमारास जळगावला आणण्यात आला. याठिकाणी शोकाकूल वातावरणात त्यांच्यावर अंत्यसंस्कार करण्यात आले. चौधरी यांच्या पश्चात पत्नी, मुलगा, दोन मुली, सून असा परिवार आहे.
