जळगाव मिरर | ११ जुलै २०२६
तालुक्यातील एका गावातील मुलगा आणि शहरातील मेहरूण भागातील एका तरुणीने प्रेमविवाह करून, शुक्रवारी, १० जुलै रोजी रात्री १०:३० वाजताच्या सुमारास हे नवदाम्पत्य संरक्षणासाठी जळगावच्या एमआयडीसी पोलीस ठाण्यात हजर झाले. यावेळी तरुण व तरुणाचे नातेवाईक आमने सामने आल्याने दोन्ही गटात एमआयडीसी पोलीस ठाण्याचा परिससरात तुंबळ हाणामारीची घटना रात्री १०.३० वाजेच्या सुमारास घडली.
दाम्पत्य पोलीस ठाण्यात हजर झाल्याची माहिती मिळताच, मुलाकडील आणि मुलीकडील नातेवाईकांनी मोठ्या संख्येने पोलीस ठाण्याबाहेर गर्दी केली. सुरुवातीला दोन्ही बाजूंनी केवळ चर्चा सुरू होती, मात्र बघता-बघता वादाची ठिणगी पडली आणि चर्चेचे रूपांतर शाब्दिक चकमकीत झाले. दोन्ही बाजूंनी अंदाजे ५० ते ६० लोक जमा झाल्यामुळे वातावरण तणावपूर्ण झाले आणि बघता-बघता दोन्ही गट एकमेकांच्या अंगावर धावून गेले.
पोलीस ठाण्याच्या आवारातच दोन्ही गट आमने-सामने आल्याने जोरदार हाणामारी सुरू झाली. यावेळी उपस्थित असलेल्या पोलिसांना जमाव आवरणे कठीण झाले. परिस्थिती हाताबाहेर जात असल्याचे पाहून पोलिसांनी तातडीने अतिरिक्त कुमक मागवली आणि हाणामारी करणाऱ्या जमावाला पांगवण्यासाठी लाठीचार्ज केला. या कारवाईनंतर सुमारे अर्ध्या तासाच्या संघर्षांनंतर तणाव निवळला आणि परिस्थिती नियंत्रणात आली.
