जळगाव मिरर | ३१ जानेवारी २०२६
जळगाव महानगरपालिकेच्या निवडणुकीचा निकाल जाहीर झाल्यानंतर आता महापौर व उपमहापौर पदासाठी राजकीय हालचालींना वेग आला आहे. भाजपसह शिंदे गटाच्या शिवसेनेकडून इच्छुकांकडून अर्ज स्वीकारण्यात आले असून, जळगाव मनपाच्या महापौर व उपमहापौरपदाची धुरा कोणाच्या खांद्यावर सोपवली जाणार, याकडे सर्वांचे लक्ष लागले आहे.
या पार्श्वभूमीवर उपमहापौर पदासाठी प्रभाग क्रमांक १ मधून दुसऱ्यांदा निवडून आलेले ऍड. दिलीप बबनराव पोकळे यांचे नाव जोरदारपणे चर्चेत आले आहे. पक्षाशी एकनिष्ठ, अनुभवी आणि संघटनात्मक कामाचा प्रदीर्घ अनुभव असलेले नेतृत्व म्हणून त्यांची ओळख आहे. सध्या शिवसेना पक्षाचे प्रतोद म्हणून त्यांच्याकडे जबाबदारी असून, गेल्या काही वर्षांत त्यांनी पक्षबांधणीसाठी उल्लेखनीय कार्य केले आहे.
पालकमंत्री गुलाबराव पाटील यांचे ते निकटवर्तीय मानले जात असून, त्यामुळे त्यांच्या नावाला अधिक बळ मिळत असल्याचे राजकीय वर्तुळात बोलले जात आहे. दरम्यान, मराठा समाजातील कार्यकर्त्यांकडूनही ऍड. दिलीप बबनराव पोकळे यांना उपमहापौरपदाची संधी देण्यात यावी, अशी जोरदार मागणी पुढे येत आहे. आता पक्षश्रेष्ठी कोणावर विश्वास दाखवतात आणि जळगाव मनपाच्या उपमहापौरपदाची सूत्रे कुणाकडे सोपवली जातात, याकडे संपूर्ण शहराचे लक्ष लागले आहे.
