जळगाव मिरर | १८ जुलै २०२३
जळगाव शहरातील दुचाकी चोरी होण्याचे प्रमाण मोठे असतांना शहर पोलिसांनी दोन दिवसापूर्वीच दोन अल्पवयीन चोरट्याकडून सहा दुचाकी जप्त केल्या होत्या तर दुसऱ्या दिवशी जिल्हा पेठ पोलिसांनी सोमवारी एरंडोल येथून ताब्यात घेतले आहे. त्याच्याकडून चोरीच्या पाच दुचाकी हस्तगत केल्या असून, जिल्हा पेठ पोलिस ठाण्यात गुन्हा दाखल करण्यात आला आहे. विशेष म्हणजे संशयित आरोपी एका खासगी कंपनीत रिकव्हरी एजंटचे काम करीत असल्याचे निष्पन्न झाले आहे. चंद्रकांत रामदास साळुंखे (वय ४२, रा. हिराशिवा कॉलनी) असे अटकेतील संस्थेत आरोपीचे नाव आहे.
जिल्हापेठ पोलिसांच्या हद्दीसह शहरातील विविध ठिकाणी दुचाकीची चोरी केल्याच्या घटना मोठ्या प्रमाणात वाढल्या आहेत. यासंदर्भात जिल्हापेठ पोलिस ठाण्यात दाखल असलेल्या एका गुन्ह्याचा शोध घेत असताना चंद्रकांत साळुंखे हाच दुचाकींची चोरी करीत असल्याचे समोर आले.
जिल्हापेठ पोलिस ठाण्याच्या पोलिस कर्मचाऱ्यांनी घटनास्थळाच्या ठिकाणी असलेल्या सीसीटीव्हीच्या आधारे संशयित आरोपी चंद्रकांत रामदास साळुंखे याची माहिती मिळाली. त्यानंतर अधिक माहिती मिळविली असता संशयित आरोपी हा एरंडोल शहरात असल्याचे समजले. त्यानुसार सोमवारी सकाळी पोलिस ठाण्याचे पोलिस निरीक्षक बबन आव्हाड यांच्या मार्गदर्शनाखाली हवालदार सलीम तडवी, रवींद्र साबळे, तुषार पाटील, महिला पोलिस नाईक भारती देशमुख यांनी संशयित आरोपी चंद्रकांत साळुंखे याला एरंडोल शहरातून ताब्यात घेतले. त्याच्याकडून चोरीच्या पाच दुचाकी हस्तगत केल्या आहेत. याप्रकरणी जिल्हापेठ पोलिस ठाण्यात गुन्हा दाखल करण्यात आला आहे.
