जळगाव मिरर | २५ मार्च २०२६
जळगाव – भुसावळ महामार्गावर असलेल्या साकेगावच्या गोदावरी हॉस्पिटल येथे केलेल्या मणक्याच्या शस्त्रक्रियेत हलगर्जीपणा झाल्याने तरुणाचा मृत्यू झाला. अशी तक्रार मंगळवारी मृत तरुणाच्या कुटुंबीयांतर्फे नशिराबाद पोलिस ठाण्यात करण्यात आली आहे. या घटनेत स्वप्नील रोहिदास बनसोडे असे मृताचे नाव आहे.
मृत स्वप्निलच्या भावाने नशिराबाद पोलिसात दिलेल्या तक्रारीनुसार स्वप्नील याला फेब्रुवारीत कमरेत दुखत असल्याने तो गोदावरी हॉस्पिटलमध्ये उपचारासाठी गेल्यानंतर त्याला मणक्याची शस्त्रक्रिया करावी लागेल असे सांगण्यात आले होते. ९ फेब्रुवारी रोजी त्याच्यावर शस्त्रक्रिया करण्यात आली. त्यानंतर त्याला घरी जाण्यास सांगण्यात आले; परंतु घरी आल्यावर शस्त्रक्रियेच्या जागेवर सूज येवून पू (पस) जमा झाला. त्यामुळे त्याचा भाऊ शुभमने त्याला पुन्हा रुग्णालयात नेले. तेथे पस काढल्यावर पुन्हा शस्त्रक्रिया करावी लागेल असे सांगण्यात आले.
शस्त्रक्रियेसाठी एक्स रे, एमआरआर किंवा अश्या कोणत्याही प्राथमिक चाचण्या न करता शस्त्रक्रिया करण्यात आली. २४ फेब्रुवारी रोजी सकाळी ९ वाजता भावाला भेटण्यास गेलेल्या शुभमला स्वप्नीलच्या अंगावर सूज आलेली दिसली. डॉक्टरांनी स्वप्नीलच्या किडनी व लिव्हरवर सूज आल्याचे सांगितले. या वेळी स्वप्नीलला खासगी दवाखान्यात घेऊन जातो असे सांगून रिपोर्टची फाईल मागितली असता ते नियमाबाहेर असल्याने देता येणार नाही असे सांगून लगेच स्वप्नीलला दुसऱ्या वॉर्डात शिफ्ट करून तेथे येण्यास किंवा अश्या आम्हाला मज्जाव केला. तेथे त्याला सीपीआर देण्यात आला. त्यानंतर तेथे डॉ. पंडीत म्हणून डॉक्टर आले. त्यांनी स्वप्नीलला व्हेंटीलेटरवर ठेवल्याच्या सांगितले. त्याला काय झाले असे विचारल्यावर त्यांनी गुगलवर सर्च करा असे उत्तर दिले. स्वप्नीलला बघण्यासाठी गेलो असता त्याचे व्हेंटीलेटर काढून त्याला मृत घोषित करण्यात आले. स्वप्नीलचा मृत्यू हा गोदावरी हॉस्पिटल व संबंधित डॉक्टर यांच्या हलगर्जीपणामुळे झाल्याचा आरोप शुभम याने तक्रारीत केला असून त्यांच्यावर सदोष मनुष्यवधाचा गुन्हा दाखल करावा. व्हीसेरा नाशिक येथील प्रयोगशाळेत पाठवण्यात यावा. तसेच शवविच्छेदन इन कॅमेरा करण्यात यावे आदी मागण्या करण्यात आल्या आहे.
याबाबत रुग्णालयाच्या प्रशासनांशी संपर्क केला असता त्यांनी याबाबत आज दि २५ रोजी आपले म्हणणे मांडणार आहे.
