जळगाव मिरर | ८ मे २०२६
जळगाव शहरातील छत्रपती शिवाजी महाराज जिल्हा क्रीडा संकुल येथे सुरू असलेल्या सुशोभीकरणाच्या कामांदरम्यान बास्केटबॉल कोर्ट आणि लॉन टेनिस मैदानाच्या दुरवस्थेकडे लक्ष वेधत युवासेनेतर्फे जिल्हाधिकारी व जिल्हा क्रीडा अधिकाऱ्यांना निवेदन देण्यात आले.
सध्या क्रीडा संकुल परिसरात विविध विकासकामे व सुशोभीकरणाचे काम सुरू आहे. या संकुलाच्या दक्षिण-पश्चिम कोपऱ्यात बास्केटबॉल कोर्ट तसेच लॉन टेनिसचे मैदान असून वर्षभर येथे विविध स्तरांवरील स्पर्धांचे आयोजन केले जाते. याच मैदानालगत ॲथलेटिक्स खेळासाठी आधुनिक रनिंग ट्रॅक तयार करण्यात आला आहे. मात्र संपूर्ण क्रीडा संकुलात केवळ बास्केटबॉल व लॉन टेनिसची मैदाने जुनी व नादुरुस्त अवस्थेत असल्याचे चित्र आहे.
खेळाडूंना दर्जेदार सुविधा उपलब्ध व्हाव्यात तसेच शहरातील क्रीडा संस्कृतीला चालना मिळावी यासाठी या मैदानांचे तातडीने दुरुस्ती व सुशोभीकरण करण्यात यावे, अशी मागणी युवासेनेतर्फे करण्यात आली आहे. याबाबत युवासेनेच्या पदाधिकाऱ्यांनी जिल्हाधिकारी रोहन घुगे तसेच जिल्हा क्रीडा अधिकारी जगदिश चौधरी यांना निवेदन सादर केले.
यावेळी युवासेना उत्तर महाराष्ट्र विभागीय सचिव विराज कावडीया, युवासेना कॉलेज कक्ष लोकसभा युवाधिकारी प्रितम शिंदे, संदिप सुर्यवंशी, अजय खैरनार, राहूल चव्हाण, पियुष हसवाल, लोकेश पाटील, कार्तिक खैरनार, गणेश भोई आदी पदाधिकारी उपस्थित होते. खेळाडूंना आधुनिक व सुरक्षित सुविधा उपलब्ध करून देण्यासाठी प्रशासनाने या मागणीची गांभीर्याने दखल घ्यावी, अशी अपेक्षा युवासेनेच्या पदाधिकाऱ्यांनी व्यक्त केली आहे.
