सोलापूर : वृत्तसंस्था
माढा तालुक्यातील परितेवाडी येथील जिल्हा परिषद शाळेत नियुक्तीस असलेले डिसले गुरुजी राजीनाम्यामुळे पुन्हा एकदा चर्चेत आले आहेत. ग्लोबल पुरस्कार प्राप्त शिक्षक रणजितसिंह डिसले यांनी नुकतीच राजीनामा पूर्व नोटीस दिली आहे. शिक्षणाधिकारी किरण लोहार यांनी डिसले गुरुजींबाबत चौकशी करून अहवाल तयार केला आहे. या अहवालानुसार कारवाई होण्याअगोदर रणजितसिंह डिसले यांनी 7 जुलै रोजी राजीनामा नोटीस दिली आहे. 8 ऑगस्ट रोजी त्यांचा राजीनामा मंजूर होऊन त्यांना कार्यमुक्त केले जाणार आहे. तरीही जिल्हा प्रशासन डिसले गुरुजींवर कारवाई करणार आहे. जवळपास चौतीस महिने कामावर हजर न राहता त्यांनी पगार घेतला आहे. हा सर्व पगार सोलापूर जिल्हा प्रशासन वसूल करणार आहे. याबाबत जिल्हा प्राथमिक शिक्षणाधिकारी किरण लोहार यांनी माहिती दिली.
डायटकडे प्रतिनियुक्तीवर असताना ३४ महिने गैरहजर राहिल्याने त्यांनी या काळात उचलेला पगार वसूल करण्यात येणार असल्याची माहिती जिल्हा परिषदेचे प्राथमिक शिक्षणाधिकारी किरण लोहार यांनी दिली. सोलापूर जिल्हा परिषदेत कार्यरत असलेले उपशिक्षक रणजितसिंह डिसले यांनी 2017 ते 2020 या कालावधीत काय केले? याबाबत सखोल चौकशी झाली आहे. याबाबत एक फाईल तयार करण्यात आली आहे. हा चौकशी अहवाल जिल्हापरिषद सीईओंकडे गोपनियरित्या सादर करण्यात आला आहे.
ग्लोबल टीचर रणजितसिंह डिसले यांना पीएचडी करण्यासाठी अमेरिकेतील फुल ब्राईट संस्थेने शिष्यवृत्ती मंजूर केली होती. त्यानुसार ऑगस्टमध्ये पी. एचडी करण्यासाठी डिसले गुरुजी अमेरिकेला जाणार होते. त्यासाठी परवानगी मागण्यासाठी जानेवारी महिन्यात ते जिल्हा परिषदेत आले होते. मुख्य कार्यकारी अधिकारी दिलीप स्वामी यांनी त्यांना शिक्षणाधिकारी किरण लोहार यांना भेटण्याचा सल्ला दिला होता. त्यावेळी शिक्षणाधिकारी लोहार यांनी रजा मंजुरीची नियमावली सांगितली होती.
रजेचा अर्ज गटशिक्षणाधिकारी यांच्याकडे द्या, तेथून तो माझ्याकडे येईल, असे न करता थेट जिल्हा परिषद मुख्य कार्यकारी दिलीप स्वामी यांच्याकडे जाणे किंवा माझ्याकडे येणे हे नियमात बसत नाही, असे कारण समोर केले. तसेच पीएचडी कोणत्या विद्यापीठात करणार आहे, पीएचडी करण्यासाठी अमेरिकन विद्यापीठाने दिलेली परवानगी सर्व माहिती सादर करा, मग रजेचा अर्ज मंजूर केला जाईल, असे सांगितले होते. गट शिक्षणाधिकाऱ्याकडे रजेसाठी सर्व कागदपत्रासह अर्ज करण्याचा सल्ला देण्यात आला होता.
रजेच्या प्रकरणानंतर डिसले गुरुजींनी मिळवलेली पदवी व त्यानंतर तीन वर्षे जिल्हा प्रशिक्षण संस्थेकडे प्रतिनियुक्तीवर असताना केलेल्या कामाबाबत शंका उपस्थित करण्यात आली होती. तत्कालीन शिक्षणअधिकारी संजय राठोड यांनी यापूर्वीच चौकशी करून अहवाल तयार केला होता. त्याबद्दल सर्व चौकशी करून विद्यमान शिक्षणाधिकारी किरण लोहार यांनी अहवाल तयार केला आणि जिल्हा परिषद सीईओ यांकडे सादर केला. कारवाई होण्याअगोदर राजीनामा नोटीस दिल्याने कारवाई थांबणार नाही, त्यांना दिलेला सर्व पगार शासन वसूल करणार असल्याची माहिती यावेळी दिली.