जळगाव मिरर | ७ मे २०२४
शहरातील हरीओम नगरात घरातून बाहेर गेलेल्या कोमल संजय निंबाळकर (वय १७) या तरुणीचा रेल्वेच्या धडकेत मृत्यू झाला. ही घटना सोमवार दि. ६ मे रोजी दुपारी तीन वाजेच्या सुमारास असोदा रेल्वेगेट जवळ घडली. या तरुणाचा शोध घेण्यासाठी गेलेल्या आईला मुलीचा मृतदेह दिसताच त्यांनी एकच आक्रोश केला. याप्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, शहरातील कांचन नगर परिसरातील हरिओम नगरमधील रहिवासी असलेली कोमल निंबाळकर ही तरुण आई, वडील व मोठ्या भावासह वास्तव्यास होती. तिचे वडील मोलमजूरी करुन कुटुंबाचा उदनिर्वाह करतात. कोमलने नुकतीच अकरावीची परिक्षा दिली होती. सोमवार दि. ६ मे रोजी कोमल | ही घरातून बाहेर गेली होती. बराच वेळ झाला तरी ती घरी न परतल्यामुळे तीची आई व मोठा भाऊ तीचा शोध घेत होते. यावेळी एका महिलेने त्यांना कोमल ही आसोदा गेटकडे जाताना दिसल्याचे सांगितले. त्या वेळी दोघेजण तिकडे गेले असता तेथे डाऊन लाईनवर खांबा क्रमांक ४२१ जवळ त्यांना कोमलचा मृतदेह दिसून आला.
कोमलचा मृत्यू हा रेल्वेचा धक्का लागल्याने झाल्याचे समजताच त्यांनी एकच आक्रोश केला. या विषयी रेल्वेच्या अधिकाऱ्यांनी तालुका पोलिसांना माहिती दिली. त्या वेळी पोलिस तेथे पोहचले व त्यांनी कोमलचा मृतदेह शासकीय वैद्यकीय महाविद्यालय व रुग्णालयात नेला. या प्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
