जळगाव मिरर । १८ नोव्हेबर २०२२
अकरा महिन्यांच्या करारावर ताबे गहाण करून दिलेल्या प्लॉटची बनावट कागदपत्रांद्वारे परस्पर विक्री केल्याप्रकरणी बुधवारी शहर पोलिसात चार जणांविरुद्ध गुन्हा दाखल करण्यात आला आहे.
मीराबाई तायडे (रा. दांडेकर नगर) यांच्या मुलाला सन २०१२ मध्ये व्यवसायात नुकसान झाले होते. मुलगा कर्जबाजारी झाल्यामुळे तायडे यांनी सन २०१३ मध्ये प्रदीप पाटील (रा. धरणगाव) यांच्याकडे मुकेश निंबाळकर यांच्या मध्यस्थीने त्यांचा प्लॉट २ लाख रुपये कर्ज घेऊन अकरा महिन्यांच्या करारावर ताबे गहाण करून दिला होता. त्यानंतर त्या मुलासह रोजगारासाठी सुरत येथे निघून गेल्या होत्या. त्यानंतर तायडे यांनी वेळोवेळी १ लाख ६७ हजार रुपये पाटील आणि निंबाळकर याला पाठविले. दरम्यान, २ नोव्हेंबर रोजी मीराबाई तायडे यांना फोन आला की तुमच्या जागेवर सलमान भंगारवाला पत्रीशेड टाकून राहत आहे. तायडे व त्यांचा मुलगा ३ नोव्हेंबरला प्लॉटची पाहणी करण्यासाठी गेले. तेव्हा सलमान भंगारवाला तेथे राहत होता. हा प्लॉट आमचा आहे, असे तायडे यांनी सांगितल्यावर त्याने प्रदीप पाटील याच्याकडून कायदेशीररीत्या जागा खरेदी केल्याचे सांगितले. त्यानंतर माय-लेकास त्याने हाकलून लावले. बुधवारी तायडे यांनी शहर पोलीस ठाण्यात धाव घेतली. त्यानंतर प्रदीप पाटील, मुकेश निंबाळकर, अनिल भोई व सलमान भंगारवाला यांच्याविरुद्ध गुन्हा दाखल करण्यात आला आहे.
