जळगाव मिरर / २९ एप्रिल २०२३ ।
राज्यात बंदी असलेल्या पानमसाला, सुगंधित तंबाखू यांची अवैधरीत्या वाहतूक करणाऱ्या दोन वाहनांवर अन्न व औषध प्रशासन विभागाने कारवाई केली. यामध्ये २६ लाख ५२ हजार ५२० रुपयांचा गुटखा व नऊ लाख रुपयांची दोन वाहने, असा एकूण ३५ लाख ५२ हजार ५२० रुपयांचा मुद्देमाल जप्त केला.
जिल्ह्यात सुरू असलेल्या गुटखा विक्री व वाहतुकीविरुद्ध अन्न व औषध प्रशासन विभागाने मोहीम हाती घेतली आहे. या मोहिमेअंतर्गत गोपनीय माहितीच्या आधारे अन्न व औषध प्रशासन विभागाच्या पथकाने गुरुवारी संध्याकाळी मुक्ताईनगर ते बऱ्हाणपूर रस्त्यावर पूर्णा नदीच्या काठावर सापळा रचला होता. त्यावेळी प्रतिबंधित अन्न पदार्थाची चोरटी वाहतूक होत असल्याच्या संशयावरून वाहन क्रमांक एमएच २०, ईएल ५८४९ व एमएच २० ईएल १७३७ या वाहनांना पथकाने थांबविले. त्याची पाहणी केली असता त्यामध्ये राज्यात उत्पादन, साठा, वितरण, विक्री व वाहतुकीकरिता बंदी असलेला पानमसाला व सुगंधित तंबाखू यांचा साठा आढळून आला. ही वाहने मुक्ताईनगर पोलिस ठाण्यात आणून मुद्देमाल जप्त केला. या प्रकरणी वाहनचालक, क्लीनर, वाहनमालक व साठा मालक यांच्याविरुद्ध गुन्हा नोंदविण्यात आला आहे. ही कारवाई अन्न व औषध प्रशासन विभागाचे सहायक आयुक्त संतोष कांबळे यांच्या मार्गदर्शनाखाली अन्न सुरक्षा अधिकारी राम भरकड यांनी केली. मुख्य सूत्रधाराचा शोध घेतला जात असल्याचे सांगण्यात आले.
