अमळनेर : विक्की उत्तम जाधव
दलित शिक्षिकेस अश्लील शिवीगाळ करणाऱ्या आरोपीस तत्काळ अटक करून न्याय मिळवून द्यावा, या मागणीसाठी रिपब्लिकन पार्टीतर्फे सोमवारी महाराणा प्रताप चौकात रास्ता रोको आंदोलन करण्यात आले.
प्रभारी तहसीलदार अमोल पाटील व सहायक पोलिस निरीक्षक राकेशसिंग परदेशी यांना निवेदन देण्यात आल्यानंतर रास्ता रोको आंदोलन मागे घेण्यात आले. याबाबत दिलेल्या निवेदनात म्हटले आहे की, दि. २८ फेब्रुवारी रोजी पीडित शिक्षिकेला आरोपी नरेंद्र हिंमतराव अहिरराव यांनी अश्लील शिवीगाळ केली. व मारहाण केली. याबाबत अमळनेर पोलिस ठाण्यात आरोपी अहिरराव यांच्या विरोधात पोलिसांत विविध कलमान्वये गुन्हा दाखल करण्यात आला होता. परंतु, या गुन्ह्यात पोलिसांनी आरोपीस अद्यापही अटक केली नसून आरोपी मोकाट फिरत आहे. या गुन्ह्यातील आरोपी हा गावातच फिरत असून, दहशत निर्माण करण्याचा प्रयत्न करत आहे. भविष्यात पीडित शिक्षिका व परिवारातील लोकांचा घातपात झाल्यास आरोपी व पोलिस प्रशासन कारणीभूत राहील, असे निवेदनात म्हटले आहे.
आरपीआयचे जळगाव जिल्हा महासचिव यशवंत बैसाने, अमळनेर तालुकाध्यक्ष पितांबर वाघ, युवा तालुकाध्यक्ष पंकज सोनवणे, आत्माराम अहिरे, किरण बच्छाव, अजय गव्हाणे, गोपाल पवार, प्रमोद बैसाने, प्रवीण वाघ, रमेश वाघ, अरुण वाघ, बाबूराव संदानशिव, एस. एन. खैरनार, अ. ना. घोलप, एन. आर. मैराळे, घनश्याम घोलप, तानाजी वाघ, चंद्रकांत नेतकर, छंनू मोरे, मनोज मोरे, दुर्गेश पवार, भाईदास कढरे, शीतल वाघ, आशा मंगळे, भटाबाई वाघ, प्रमिला ढिवरे, रत्नमाला सोनवणे आदींनी आंदोलनात सहभाग घेतला.
