जळगाव मिरर । ९ मे २०२३
जळगाव शहरापासून जवळ असलेल्या व गिरणा नदीपात्रावर असलेले आव्हाणे गावात काही ग्रामस्थांनी दोन अवैध वाळूची वाहतूक करणारे दोन ट्रॅक्टर भरदुपारी पेटवून दिल्याची धक्कादायक घटना घडली आहे. यामुळे वाळुमाफीयांमध्ये मोठी खळबळ उडाली होती.
मिळालेली माहिती अशी कि, जळगाव तालुक्यातील आव्हाणे गावात दि.9 रोजी दुपारच्या सुमारास वाळू वाहतूक करणारे दोन ट्रॅक्टर नदीपात्रातून येत गावाच्या बाहेरच्या दिशेने जात असतांना रस्त्यावर असलेल्या एका रिक्षाला या वाहनाचा जोरदार धक्का लागल्याने या अपघातात रिक्षा क्र.एम.एच.19,1413 याच्यातील रिक्षा चालकासह तीन महिला जखमी झाल्याची घटना घडल्यानंतर संतप्त ग्रामस्थांनी एकत्रित येत या दोन वाळूच्या ट्रॅक्टरला पेटवून दिल्याची घटना घडली. यात ट्रॅक्टर चालक व मालक राहूल बारेला रा. मध्यप्रदेश ह.मु. आव्हाणे ता.जि.जळगाव याच्या मालकीचे दोन ट्रॅक्टर असल्याचे समजते. ही घटना घडल्यानंतर दोन्ही ट्रॅक्टर चालकांना जागेवर ट्रॅक्टर सोडून घटनास्थळाहून पसार झाले. अपघातानंतर आव्हाणे गावातील संतप्त ग्रामस्थांनी उभे असलेले दोन्ही ट्रॅक्टर पेटवून दिले. या घटनेमुळे एकच खळबळ उडाली आहे. शेवटचे वृत्त हाती आले तोपर्यंत तालुका पोलिसात कुठलीही गुन्ह्याची नोंद झालेली नव्हती.
