जळगाव मिरर | १८ मे २०२३
घरातील कचरा फेकण्यासाठी जात असलेल्या वृद्ध महिलेच्या गळ्यातील १० हजार रूपये किमतीची मंगलपोत ओढून चोरटा पसार झाल्याची घटना नूतन वर्षा कॉलनीमध्ये ३ मे रोजी सकाळी १०:१५ वाजता घडली. याप्रकरणी रामानंदनगर पोलिस ठाण्यात बुधवारी तक्रार दिल्यानंतर गुन्हा दाखल झाला.
मिळालेल्या माहितीनुसार शहरातील महाबळ परिसरातील नूतन वर्षा कॉलनीत प्रेमलता नारायण सोनवणे या बुधवार, दि. ३ मे रोजी कचरा फेकण्यासाठी घराबाहेर आल्या होत्या. त्यावेळी अचानक समोरून एक अनोळखी पुरुष आला. त्याने सोनवणे यांच्या गळ्यातील सोन्याची पोत ओढून पळ काढला. महिलेने आरडाओरड केल्यानंतर तिचे कुटुंबीय घराबाहेर आले. त्यांनी चोरट्याचा शोध घेतला, मात्र तो मिळून आला नाही. या घटनेमुळे महिला प्रचंड घाबरून गेली होती. प्रकृती ठीक झाल्यानंतर बुधवार, दि. १७ मे रोजी रामानंद नगर पोलिस ठाण्यात तक्रार दिल्यानंतर चोरट्याविरुद्ध गुन्हा दाखल करण्यात आला आहे.
