जळगाव मिरर | ३० जुलै २०२३
जगात सोशल मिडियाचे मोठे जाळे निर्माण झाले असून प्रत्येक घटनेचे व्हिडीओ सोशल मिडीयावर प्रसारित होत असल्याने अनेक माहित नसलेल्या घटना देखील समोर येत असतात. अशीच एक घटना समोर आली आहे. हि घटना बीड जिल्ह्यातील धारुर तालुक्यातील हा व्हिडीओ सध्या मोठ्या प्रमाणावर व्हायरल होत आहे.
एका शाळेतील शिक्षिका आणि शाळेत खिचडी शिजवणारी महिला या दोघींमधील भांडणाचा हा व्हिडीओ आहे, या व्हिडीओमध्ये त्या एकमेकींचे केस ओढताना दिसत आहेत. जोड हिंगणी येथील जिल्हा परिषद शाळेतील हा व्हिडीओ असल्याची माहिती आहे. चांगला आहार देत नसल्याचा जाब महिला शिक्षिकाने खिचडी शिजवणाऱ्या महिलेला विचारल्यावर त्या दोघींमध्ये मारहाण झाल्याचं बोललं जात आहे.
मिळालेल्या माहितीनुसार, जोड हिंगणी येथील जिल्हा परिषद प्राथमिक शाळेत सरकारकडून आलेला आहार मुलांना दिला जातो. तर, विद्यार्थ्यांना दर्जेदार आहार दिला जात नसल्याचा आरोप शिक्षिकेने केला आहे. या संदर्भात एका महिला शिक्षिकेने शनिवारी खिचडी शिजवणाऱ्या महिलेस प्रश्न विचारल्याने संबंधित महिलेला राग आला. त्यामुळे खिचडी शिजवणाऱ्या महिलेने या शिक्षिकेसोबत वाद घालायला सुरुवात केली. पाहता पाहता वाद एवढा वाढला की, या दोघींनी एकमेकांचे केस धरले आणि मारहाण सुरु झाली. याचवेळी घटनास्थळी उपस्थित असलेल्या इतर महिलांनी वाद सोडवण्यासाठी प्रयत्न केला, मात्र दोघेही कोणाचचं ऐकण्याच्या मनस्थितीत नव्हत्या. दोन्ही हातांनी केस पकडून एकमेकींना मारत असल्याचे व्हिडीओमध्ये दिसत आहे. या घटनेचा व्हिडीओ सोशल मिडीयावर मोठ्या प्रमाणवर व्हायरल झाला आहे.
