मुक्ताईनगर : प्रतिनिधी
नगरपंचायत येथे नगराध्यक्ष दालनात भाजपा व शिवसेनेच्या पुढाकाराने अखेर पंतप्रधान नरेंद्र मोदी व स्वर्गीय बाळासाहेब ठाकरे तसेच राज्याचे मुख्यमंत्री उद्धव ठाकरे यांच्या प्रतिमा भेट देऊन लावण्यात आल्या. येथे दि.१९ एप्रिल नगरपंचायतच्या विशेष सभेत महापुरुषांचे तसेच पंतप्रधान, स्व. बाळासाहेब ठाकरे व मुख्यमंत्री यांची प्रतिमा लावण्यावरून प्रभारी नगराध्यक्ष, मुख्याधिकारी यांचेशी नगरसेवकांचा शाब्दिक वाद झाला होता. परिपत्रक तपासणार नंतरच प्रतिमा लावणार, असा शब्द मुख्याधिकारी यांनी दिला होता.
पंतप्रधान, स्वर्गीय बाळासाहेब ठाकरे व राज्याचे मुख्यमंत्री यांची प्रतिमा लावण्याकरिता परिपत्रक शासनदरबारी नमूद आहे, परंतु माजी मंत्री खडसे यांचा फोटो लावण्याचा कोणता जीआर आहे? असा प्रतिप्रश्न विचारला असता नगराध्यक्ष व मुख्याधिकारी यांच्यातर्फे कोणतेही उत्तर न मिळाल्याने शेवटी तालुक्यातील शिवसेनेने पुढाकार घेत सोबत भाजपाचे विधानसभा क्षेत्र प्रमुख यांनी पंतप्रधान नरेंद्र मोदी व स्वर्गीय बाळासाहेब ठाकरे व राज्याचे मुख्यमंत्री उद्धव ठाकरे यांच्या प्रतिमा नगराध्यक्ष यांच्या दालनात लावल्या.
यावेळी शिवसेना तालुकाप्रमुख छोटू भोई, विधानसभा क्षेत्र सुनील पाटील, शहर प्रमुख गणेश टोंगे, तालुका प्रमुख प्रफुल पाटील, अल्पसंख्यांक जिल्हा संघटक अफसर खान, पंकज राणे, वसंता भलंभले, नगरसेवक राजेंद्र हिवराळे, मुकेश वानखेडे, निलेश शिरसाठ, संतोष मराठे, आरिफ आजाद नूर मोहम्मद खान तसेच भाजपाचे नगरसेवक तथा विधानसभा क्षेत्र प्रमुख ललित महाजन उपस्थित होते.
