जळगाव मिरर | ३० नोव्हेबर २०२३
एका जोडप्याच्या वादामुळे बुधवारी म्युनिक-बँकॉक लुफ्थांसा विमान दिल्लीत इंदिरा गांधी विमानतळावर उतरविण्यात आले. हे प्रकरण सध्या व्हायरल होत आहे. सदर विमान बुधवारी सकाळी १०:२६ विमानतळावर उतरले आणि वैमानिकांनी हवाई नियंत्रकांशी संपर्क साधून त्यांना अनियंत्रित प्रवाशाबद्दल माहिती दिली. त्यानंतर प्रवाशाला अधिकाऱ्यांच्या ताब्यात देण्यात आले.
एक जर्मन पुरुष आणि त्याची थाई पत्नी यांच्यातील वादामुळे लुफ्थान्सा विमानात गोंधळाचे वातावरण निर्माण झाल्याने दिल्ली विमानतळावर विमान उतरविण्याची परवानगी मागण्यात आली होती. पती आपल्याला धमकी देत आहे, अशी तक्रार वैमानिकाकडे करत पत्नीने हस्तक्षेप करण्याची मागणी केली. ५३ वर्षीय जर्मन प्रवाशाने कथितरीत्या अन्न फेकले, लायटर वापरून ब्लॅकेट जाळण्याचा प्रयत्न केला, आपल्या पत्नीवर ओरडला आणि विमान कर्मचाऱ्यांनी दिलेल्या सूचनांचे पालन केले नाही. पत्नी वेगळ्या पीएनआर तिकिटावर प्रवास करत होती आणि तिला बँकॉकला प्रवास सुरू ठेवायचा होता, असे त्यांनी सांगितले. विमान कंपनी येथील जर्मन दूतावासाशीही समन्वय साधत आहे. अनियंत्रित प्रवाशाला पोलिसांकडे सोपविण्याचा किंवा माफीचा विचार करून त्याला दुसऱ्या विमानाने जर्मनीला परत पाठवण्याचा निर्णय प्रलंबित आहे.