जळगाव : प्रतिनिधी
अज्ञात वाहनाने दिलेल्या धडकेत दुचाकीस्वार जागीच ठार झाल्याची घटना घडली आहे. याबाबत पोलीसात अकस्मात मृत्यूची नोंद करण्यात आली आहे.
सविस्तर वृत्त असे की, शहरातील दुध फेडरेशन परिसरातील महाविर नगरातील रहिवासी अभिजित विनायक कोचूरे (वय-२२) हा तरूण आई, वडिलांसह वास्तव्याला आहे. दरम्यान, तो दुचाकीने ते पहूर येथून जळगावकडे येत असतांना गाडेगाव येथील सुप्रिम पाईप कंपनीजवळ भरधाव वेगाने येणाऱ्या वाहनाने जोरदार धडक दिल्याने त्याचा जागीच मृत्यू झाल्याची घटना मंगळवारी ३ मे रोजी पहाटे ३ वाजेच्या सुमारास घडली. अभिजित हा एकुलता एक मुलगा असल्याचे समजते तर आई जिल्हा परिषदमध्ये कार्यरत असल्याची माहितीही सूत्रांनी दिली आहे.
दरम्यान, काही वाहनधारकांनी तातडीने खासगी वाहनाने जिल्हा शासकीय वैद्यकीय महाविद्यालयात उपचारार्थ दाखल केले असता वैद्यकीय अधिकारी यांनी मयत घोषीत केले. याबाबत जळगाव तालुका पोलीसात अकस्मात मृत्यूची नोंद करण्यात आली आहे. पुढील प्राथमिक तपास अनिल फेगडे करीत आहे.
