जळगाव मिरर | ६ फेब्रुवारी २०२४
पती कामावर गेलेला असताना घरात एकटीच असलेल्या मनीषा लहू मोरे (वय २५, रा. आव्हाणे, ता. जळगाव) या विवाहितेने गळफास घेत आपली जीवनयात्रा संपविली. ही घटना सोमवार दि. ५ फेब्रुवारी रोजी दुपारच्या सुमारास उघडकीस आली. विवाहितेच्या आत्महत्येचे कारण अद्याप अस्पष्ट असून याप्रकरणी तालुका पोलिसात अकस्मात मृत्यूची नोंद करण्यात आली आहे.
मिळालेल्या माहितीनुसार, जळगाव तालुक्यातील आव्हाणे येथे लहू मोरे पत्नी व तीन वर्षीय मुलीसह वास्तव्यास आहेत. दि. ५ फेब्रुवारी रोजी नेहमीप्रमाणे ते सकाळीच कामावर निघून गेले. त्या वेळी घरात एकटीच असताना मनीषा मोरे या विवाहितेने गळफास घेत आपली जीवनयात्रा संपविली. घराचा दरवाजा उघडाच असल्याने दुपारी साडेबारा वाजेच्या सुमारास शेजारील मंडळींना विवाहिता गळफास घेतलेल्या अवस्थेत दिसली.
त्या वेळी त्यांनी तिच्या पतीला घटनेची माहिती कळवली व मृतदेह शासकीय वैद्यकीय महाविद्यालय व रुग्णालयात नेण्यात आला. तेथे डॉक्टरांनी विवाहितेला मृत घोषित केले. तालुका पोलिस ठाण्यात अकस्मात मृत्यूची नोंद करण्यात आली आहे. मयत विवाहितेच्या पश्चात पती, तीन वर्षाची मुलगी आहे.
