भुसावळ : प्रतिनिधी
गेल्या दोन वर्षांपासून कमी-अधिक प्रमाणात शाळा उघडल्याने विद्यार्थ्यांचे बरेसचे शैक्षणिक नुकसान झाले आहे. हे नुकसान भरून काढण्यासाठी शिक्षकांनी विद्यार्थ्यांच्या अध्ययनात नाविण्यपूर्णता आणल्यास त्यांना शाळेची गोडी लागून शैक्षणिक गुणवत्ता वाढीस लागेल, असेही डायट प्राचार्य डॉ. अनिल झोपे यांनी शिक्षकांशी संवाद साधतांना सांगितले. यावेळी त्यांनी विद्यार्थ्यांशी देखील संवाद साधला. तसेच शाळेचा भौतिक परिसर, बाला उपक्रमांतर्गत शाळेची केलेली वैविध्यपूर्ण सजावट, अध्ययन-अध्यापनासाठी पोषक वातावरण, विद्यार्थ्यांची उपस्थिती आणि गुणवत्ता पाहून त्यांनी सर्व शिक्षकांचे कौतुक केले. अधिव्याख्याता डॉ. चंद्रकांत साळुंखे व अधिव्याख्याता डॉ. अरूण भांगरे यांनी देखील विद्यार्थ्यांशी संवाद साधला.
जिल्हा शिक्षण व प्रशिक्षण संस्था तथा डायट या संस्थेतील अधिव्याख्याता यांच्यातर्फे जिल्हा परिषद शाळांमधील विद्यार्थ्यांचे सेतू अभ्यास सर्वेक्षण करण्यात येत आहे. जळगाव तालुक्यातील कंडारी येथील जिल्हा परिषद मराठी शाळेतील विद्यार्थ्यांचे डायटतर्फे सर्वेक्षण करण्यात आले.
सर्वेक्षणात डायट प्राचार्य डॉ. अनिल झोपे, अधिव्याख्याता डॉ. चंद्रकांत साळुंखे, अधिव्याख्याता डॉ. अरूण भांगरे यांनी विद्यार्थ्यांकडून पुनर्रचित सेतू अभ्यास सर्वेक्षण ऑनलाईन पद्धतीने लिंक भरून करून घेतले. यावेळी लिंकमधील विविध प्रश्नांची उत्तरे विद्यार्थ्यांनी भरून दिली. प्रसंगी शाळेतील शिक्षक सुनंदा रोझतकर, सविता निंभोरे, विनोद जयकर, गणेश तांबे, डॉ. जगदीश पाटील आदी शिक्षकांची उपस्थिती होती. सेतू अभ्यास सर्वेक्षणात राज्य शैक्षणिक संशोधन व प्रशिक्षण परिषद पुणे यांच्यामार्फत पुनर्रचित सेतू अभ्यासामध्ये समाविष्ट अध्ययन निष्पत्तीवर आधारित प्रश्न निर्धारित करण्यात आले आहेत. त्यात इयत्तानिहाय एकच प्रश्नपत्रिका तयार करण्यात आली असून त्यामध्ये संबंधित इयत्तेतील हिंदी विषय सोडून सर्व विषयांवरील प्रश्नांचा समावेश करण्यात आलेला आहे. तसेच प्रत्येक विषयासाठी दहा प्रश्न विचारण्यात आले आहेत.
अध्ययन क्षय भरून काढण्यासाठी सर्वेक्षण –
राज्यातील विद्यार्थ्यांचा अध्ययन क्षय भरून काढण्यासाठी यंदाच्या शैक्षणिक वर्षासाठी पुनर्रचित सेतू अभ्यास तयार करण्यात आला आहे. त्याची शालेय स्तरावर अंमलबजावणी होणार असून त्यापूर्वी विद्यार्थ्यांची शालेय स्तरावर इयत्ता व विषयनिहाय पूर्व चाचणी घेण्याची सूचना राज्य शैक्षणिक संशोधन व प्रशिक्षण परिषद पुणे यांच्यातर्फे देण्यात आल्या आहेत. त्यानुसार सेतू अभ्यासाची परिणामकारकता तपासण्यासाठी प्रायोगिक तत्त्वावर इयत्ता दुसरी ते दहावीच्या विद्यार्थ्यांचे नमुना आधारित सर्वेक्षण घेण्यात येत आहे. या सर्वेक्षणाद्वारे प्राप्त झालेल्या माहितीचे विश्लेषण करून त्याचे निष्कर्ष प्रसिद्ध केले जाणार आहेत. हे सर्वेक्षण डायटचे अधिव्याख्याता, गटशिक्षणाधिकारी, शिक्षण विस्तार अधिकारी, केंद्रप्रमुख, विषय सहाय्यक, विषय साधन व्यक्ती, समावेशीत शिक्षणतज्ञ व विशेष शिक्षक यांच्या सहकार्याने घेतले जात आहे. त्यानुसार जळगाव तालुक्यातील कंडारी येथील जिल्हा परिषद मराठी शाळेत डायट प्राचार्य डॉ. अनिल झोपे, अधिव्याख्याता डॉ. चंद्रकांत साळुंके, अधिव्याख्याता डॉ. अरूण भांगरे यांनी भेट देऊन विद्यार्थ्यांचे सेतू अभ्यास सर्वेक्षण करून घेतले.
