जळगाव मिरर | १ जानेवारी २०२५
बीड जिल्ह्यातील खून प्रकरण गेल्या काही दिवसापासून राज्यभर गाजत असतांना नवीन वर्षाच्या पहिल्याच दिवशी मस्साजोगमध्ये गावकऱ्यांनी आज सामूहिक जलसमाधी आंदोलन पुकारलं. सरपंच संतोष देशमुख यांच्या मारेकऱ्यांना अटक करण्यासाठी हे आंदोलन करण्यात आलं. महिला आणि पुरुष नदीत उतरले होते. तर हे दृश्य पाहण्यासाठी अख्खं गाव नदी किनारी जमा झालं होतं. या घटनेची माहिती मिळताच पोलीस अधिक्षक नवनीत कॉवत यांनी घटनास्थळी धाव घेऊन गावकऱ्यांना समजावण्याचा प्रयत्न केला. यावेळी गावकऱ्यांनीही आक्रमक भूमिका घेतली. एक तर तुम्ही तिन्ही आरोपींना अटक करा. त्यांना कधी अटक करणार याची तारीख सांगा. नाही तर आम्हाला गोळ्या तरी घाला, अशी संतप्त भावना या गावकऱ्यांनी व्यक्त केली.
संतोष देशमुख यांच्या मारेकऱ्यांनना अटक करण्यासाठी मस्साजोगच्या गावकऱ्यांनी जलसमाधी आंदोलन सुरू केलं. महिला आणि पुरुष नदीत कमरेएवढ्या पाण्यात उतरले होते. हे सामूहिक जलसमाधी आंदोलन पाहण्यासाठी मस्साजोगसह इतर गावातील गावकरी नदी किनारी आले होते. यावेळी एक महिला आणि तरुणाची प्रकृती बिघडली. त्यामुळे त्यांना स्ट्रेचरवरून नदीतून बाहेर आणण्यात आलं. यावेळी पोलीस अधिक्षक नवनीत कॉवत हे आपल्या सहकाऱ्यांसोबत घटनास्थळी दाखल झाले. यावेळी त्यांनी गावकऱ्यांना समजावण्याचा प्रयत्न केला. तेव्हा गावकऱ्यांनीही आक्रमकपणे आपलं म्हणणं मांडलं.
आरोपींना अटक का होत नाही? आमचं गाव दहशतीखाली आहे. आमच्या गावात एक पोलीस चौकी द्या. वाल्मिक कराडला अटक होणार असल्याची माहिती त्याच्या समर्थकांना कशी कळली? त्याच्या समर्थनासाठी परळीतून त्याच दिवशी 100 गाड्या पुण्याला जातात. एवढी माहिती त्या लोकांना आहे. आरोपीचा व्हिडीओ येतो. जनरल लोकांना ज्या गोष्टी माहीत आहे, त्या पोलीस प्रशासनाला माहीत नाही. मग बाकीचे आरोपी माहीत नाही हे कशावरून समजायचं?, असा सवाल गावकऱ्यांनी कॉवत यांना केला. आरोपींना कधी अटक होणार याची तारीख सांगा. तुम्ही जी तारीख सांगाल तोपर्यंत आम्ही तुम्हाला एका शब्दानेही बोलणार नाही. त्यानंतर तुम्ही तुमचे गनवाले लोकं आणा आणि आम्हाला गोळ्या घाला, असं सांगतानाच आम्ही तुम्ही आलात म्हणून आम्ही पाण्याबाहेर बाहेर आलो. बाया आम्हाला शिव्या देत आहेत, असं गावकरी म्हणाले.
