जळगाव मिरर | १३ जानेवारी २०२५
शहरात प्रवेश केल्यानंतर स्वातंत्र्य चौकातील अरुंद वळणावर एसटी महामंडळाच्या भरधाव बसने दुचाकीस्वार ३५ वर्षीय सैन्य दलातील जवानाला जोरदार धडक दिली. गंभीर जखमी जवानावर खासगी रुग्णालयात उपचार केल्यानंतर पुणे येथे हलवण्यात आले. अभिमन्यू लक्ष्मण शिनकर (३५, रा. आमखेडा, ता. सोयगाव, जि. छत्रपती संभाजीनगर, ह. मु. अरिहंत कॉलनी) असे गंभीर जखमीचे नाव आहे.
मिळालेल्या माहितीनुसार, अभिमन्यू शिनकर हे सुटी घेऊन घरी आले आहे. रविवारी दुचाकीने (क्र. यूके ०७, डीएफ ५४५१) त्यांच्या मोठ्या भावाकडे जात असताना स्वातंत्र्य चौकात त्यांना मागून भरधाव बसने धडक दिली. यात शिनकर हे रस्त्यावर कोसळले व बसचे चाक त्यांच्या पायावरून गेल्याने गंभीर जखमी झाले. तालुका पोलिस ठाण्यातील कर्मचारी तुषार जोशी व गणेश पाटील यांनी शिनकर यांना शासकीय वैद्यकीय महाविद्यालय व रुग्णालयात दाखल केले. नातेवाईक रुग्णालयात आल्यानंतर त्यांनी अभिमन्यू शिनकर यांना खासगी रुग्णालयात दाखल केले. पायाची अनेक हाड मोडलेली असल्याने त्यांना ऑपरेशन करावे लागणार असल्याने पुढील उपचारासाठी पुणे येथे हलवले आहे. अपघात होताच घटनास्थळी नागरिकांनी मोठ्या प्रमाणात गर्दी केली होती. वळणाचा अंदाज न आल्याने अपघात झाल्याचे सांगण्यात येते आहे.
