जळगाव मिरर | ७ मार्च २०२५
जिल्ह्यातील अनेक ठिकाणी अपघाताच्या घटना घडत असतांना आता धरणगाव शहराजवळील जी.एस. कॉटन जिनिंग जवळ भरधाव डंपरच्या धडकेत ६६ वर्षीय सायकलस्वार जागीच ठार झाल्याची घटना गुरुवारी ६ मार्च रोजी रात्री ९ वाजेच्या सुमारास घडली आहे. या घटनेची माहिती मिळाल्यानंतर धरणगाव पोलीस ठाण्याचे पोलीस कर्मचारी यांनी धाव घेतली व मृतदेह धरणगाव ग्रामीण रुग्णालयात दाखल करण्यात आला आहे. दत्तात्रय पाटील वय ६६, रा. धरणगाव असे मयत झालेल्या वृद्ध सायकलस्वाराचे नाव आहे.
मिळालेल्या माहितीनुसार, धरणगाव शहरातील एका जिनिंग कंपनीमध्ये दत्तात्रय पाटील हे वॉचमन म्हणून नोकरीला होते. नेहमीप्रमाणे गुरुवारी ६ मार्च रोजी रात्री ९ वाजेच्या सुमारास सायकलने कामावर जात असताना शहरातील जीएस कॉटन जिनिंग जवळ समोरून भरधाव डंपरने त्यांना धडक दिली. या धडकेत ते चाकाखाली आल्याने ते जागीच ठार झाले. या डंपरमध्ये वाळू असल्याचे नागरिकांकडून सांगण्यात आले आहेत. अपघात घडल्यानंतर डंपर चालक हा वाहन सोडून फरार झाला होता. या घटनेची माहिती मिळाल्यानंतर धरणगाव पोलीस ठाण्याचे पोलीस कर्मचारी यांनी घटनास्थळी धाव घेऊन पंचनामा करून मृतदेह धरणगाव ग्रामीण रुग्णालयात दाखल करण्यात आला आहे.
