जळगाव मिरर | ११ एप्रिल २०२५
भुसावळ शहरातील महिंद्रा कंपनीची स्कॉर्पिओ या चारचाकी वाहन चोरणाऱ्यास गुन्हा दाखल झाल्यानंतर तांत्रिक विश्लेषण करून आरोपीस भुसावळ शहर पोलिसांनी ताब्यात घेतले आहे. तर हे वाहन घेणाऱ्यासही पोलिसांनी ताब्यात घेतले आहे.
भुसावळ शहर पोलीस ठाण्यात चारचाकी वाहन चोरी झाल्याप्रकरणी गुन्हा दाखल झाला होता. यानंतर तांत्रिक विश्लेषण केल्यानंतर यवतमाळ येथीलप्रफ्फुल गजानन गांगेकर यानेच हा गुन्हा केल्याची खात्री झाली तसेच याबाबत माहिती प्राप्त होताच उपविभागीय पोलिस अधिकारी कृष्णकांत पिंगळे यांच्या मार्गदर्शनाखाली व पोलीस निरीक्षक उद्धव डमाळे यांच्या आदेशाने एक पथक तयार करून यवतमाळ येथे आरोपीचा शोध घेण्यासाठी रवाना करण्यात आले होते. पथकातील पो.हे.कॉ उमाकांत पाटील, पोलीस शिपाई राहुल भोई यांनी येथे यवतमाळ येथे अवधूतवाडी येथील पोलीस ठाण्यातील गुन्हे शोध पथकातील अंमलदार यांची या प्रकरणात मदत घेतली. सलग तीन दिवस या आरोपीचा शोध घेतल्यानंतर अखेर त्यास ताब्यात घेतले.
आरोपी प्रफ्फुल गांगेकर याने चारचाकी वाहन चोरी केल्याची कबुली दिल्यानंतर त्यास अटक करुन भुसावळ शहर पोलीस ठाण्यात आणले. दरम्यान, त्याने हे वाहन नागपूर येथील त्याचे साथीदार सैफुद्दीन खान यास दिल्याची माहिती दिली. त्यानंतर त्यालाही नागपूर येथे जावून ताब्यात घेण्यात आलेले आहे. या प्रकरणाचा तपास सहाय्यक फौजदार विनोद नेवे करत आहेत. ही कारवाई उपविभागीय पोलिस अधिकारी कृष्णकांत पिंगळे पोलीस निरीक्षक उद्धव डमाले यांचे मार्गदर्शनात पो.हे.कॉ. उमाकांत पाटील, संदीप पालवे, पोलीस शिपाई राहुल भोई यांनी केली.
