जळगाव मिरर | ३० एप्रिल २०२५
अमळनेर तालुक्यातील कामतवाडी येथून जळगावला गांजा विक्रीसाठी नेणाऱ्या धरणगाव तालुक्यातील दोघांना पोलिसांनी अटक केली. त्यांच्याकडून ९० हजार २४६ रुपये किमतीचा ४ किलो ५४६ ग्राम गांजा आणि ४५ हजार रुपये किमतीची मोटरसायकल जप्त करण्यात आली आहे.
सविस्तर वृत्त असे कि, अमळनेर तालुक्यातील कामतवाडी येथून गांजाची वाहतुक होत असल्याची माहिती पोलीस निरीक्षक दत्तात्रय निकम यांना मिळाली. त्यानुसार (एमएच १९, डीआर ९७९१) क्रमांकाच्या दुचाकीवरुन गांजाची वाहतुक करणाऱ्याला पोहेकॉ सुनील जाधव, राहुल पाटील, जितेंद्र निकुंभे, अमोल पाटील, उदय बोरसे, समाधान सोनवणे, सुनील पाटील यांच्या पथकाने तोरणामाता मंदिराजवळ सापळा रचून त्यांना ताब्यात घेतले. त्यांची चौकशी केली असता, त्यांच्याजवळील गोणीत ४ किलो ५४६ ग्राम गांजा आढळून आला.
रेल्वे स्टेशनच्या गेटच्या आडोश्याला टपरीच्या बाजूला काहीजण गांजा ओढत असल्याची माहिती मिळताच उपनिरीक्षक राजू जाधव, प्रशांत पाटील, मिलिंद सोनार, निलेश मोरे, विनोद संदानशिव यांच्या पथकाने दि. २८ रोजी रात्री पावणे नऊ वाजेच्या सुमारास छापा टाकला. त्याठिकाणाहून शुभम आनंदा पाटील (वय २८ रा. बंगालीफाईल) याला अटक करण्यात आली. त्याच्याविरुद्ध गुन्हा दाखल करण्यात आला आहे. तपास पोहेकों अशोक साळुंखे करीत आहेत.
