जळगाव मिरर | ३ मे २०२५
पहलगाम अतिरेकी हल्ल्यामुळे अवघ्या देशात संतापाची लाट उसळली असताना आता शिर्डीचे साईसमाधी मंदिर बॉम्बने उडवून देण्याची धमकी देण्यात आली आहे.कोट्यावधी साईभक्त देशाच्या कानाकोपऱ्यातून शिर्डीत दर्शनासाठी येत असतात. कोट्यावधी भक्तांचं श्रद्धास्थान असलेल्या शिर्डीच्या साईबाबा मंदिराला पाईप बॉम्बने उडवून देण्याची धमकी मिळाली आहे. साई संस्थानच्या ईमेल ॲड्रेसवर मेल पाठवून साईबाबा मंदिर उडवण्याची धमकी देण्यात आली आहे.
धमकीचा मेल दक्षिण भारतातून आल्याची प्राथमिक माहिती मिळत आहे. साई संस्थानकडून आंध्रप्रदेश आणि तामिळनाडू सरकारला संपर्क करणे सुरु आहे. साई मंदिर सुरक्षा प्रमुख पोलीस उपनिरीक्षक रोहीदास माळी यांनी शिर्डी पोलिसांत गुन्हा दाखल केला आहे. याप्रकरणी अज्ञात आरोपी विरुद्ध भारतीय न्याय संहिता कलम 351 (4) प्रमाणे गुन्हा दाखल करण्यात आला आहे. पोलिसांकडून सतर्कता म्हणून परिसरात बंदोबस्त वाढवण्यात आला आहे. साई मंदिराची सुरक्षा व्यवस्था देखील अलर्टवर आहे.
