जळगाव मिरर | २१ मे २०२५
जामनेर तालुक्यातील खादगाव अंबिलहोळ रस्त्यावर ब्लास्टींगच्या ट्रॅक्टरवरील चालकांचा ताबा सुटल्याने ट्रॅक्टर रस्त्याच्या कडेला खोल दरीमध्ये जाऊन पडल्याने चालक गुलाब जेमा चव्हाण (अंबिलहोळ, वय ३५) याचा दबून जागीच मृत्यू झाल्याची दुर्दैवी घटना दि.२० रोजी सायंकाळी ५ वाजेच्या सुमारास घडली आहे. गुलाबच्या लहान भावाचे लग्न येत्या ३० मे रोजी आयोजित करण्यात आले आहे. ऐन लग्नाच्या तोंडावर आठ दिवसांच्या अगोदरच चव्हाण परीवारावर गुलाबच्या अशा अचानक जाण्याने दुःखाचा डोंगर कोसळला आहे त्यामुळे परीसरात हळहळ व्यक्त केली जात आहे.
सविस्तर वृत्त असे कि, अंबिलहोळ येथील गुलाब चव्हाण हा नेहमी प्रमाणे आपले कामकाज आटोपून सायंकाळी आपल्या ताब्यातील ब्लास्टींगचे ट्रॅक्टर चालवित एमआयडीसी खादगाव रस्त्याने अंबिलहोळ येथे घरी जाण्यासाठी निघाला होता. अचानक त्याचा ट्रॅक्टरवरील ताबा सुटल्याने सदर ट्रॅक्टर रस्त्याच्या कडेला खोल दरीमध्ये जाऊन गुलाबच्या अंगावर पडले. घटनेची माहिती मिळताच मंत्री गिरीष महाजन यांचे आरोग्यदूत जालमसिंग राजपूत, कैलास पालवे, बाळू चव्हाण, नटवर चव्हाण यांनी तात्काळ घटनास्थळी धाव घेऊन गुलाबला ट्रॅक्टर खालून काढून जामनेर येथील उपजिल्हा रुग्णालयात दाखल केले असता तेथील डॉक्टरांनी गुलाबला मृत घोषित केले. मयत गुलबाच्या पश्चात पत्नी, २ मुलं, आई, वडील, भाऊ असा परिवार आहे.
