जळगाव मिरर | १ सप्टेंबर २०२५
शहरातील दुध फेडरेशन रोड परिसरातील खडके चाळ येथे श्री गुरुदत्त उत्सव समिती मित्र मंडळ यांच्यावतीने सोमवार, दिनांक १ सप्टेंबर २०२५ रोजी रात्री ८ वाजता “एक शाम श्याम बाबा के नाम” हा भक्तिरसात न्हालेला कार्यक्रम आयोजित करण्यात आला आहे. हा कार्यक्रम रात्री उशिरापर्यंत, म्हणजेच प्रभू इच्छा होईपर्यंत चालणार आहे.
या भक्तिपूर्ण संध्याकाळी श्याम बाबांची महती, त्यांची भक्ती आणि भक्तांचे प्रेम एकत्रित अनुभवायला मिळणार आहे. या कार्यक्रमात विशेष आकर्षण ठरणार आहे. बुरहानपूर येथून आलेल्या प्रसिद्ध गायिका खुशबू चौकसे आपल्या सुमधुर आणि भक्तिभावपूर्ण आवाजात श्याम बाबांची गीते सादर करून संपूर्ण वातावरण भक्तिमय करणार आहेत. त्यांच्या गायनातून प्रेक्षकांना एक वेगळाच आध्यात्मिक अनुभव मिळणार आहे.
तसेच या कार्यक्रमामध्ये श्री श्याम मित्र परिवार भजन मंडळ, शनिपेठ यांचे देखील विशेष सहभाग असून, त्यांच्या सादरीकरणाने दरबारात भक्तिरस अधिकच फुलणार आहे. पारंपरिक वेशभूषा, भक्तिगीते, मंत्रमुग्ध करणारी संगीतातील अनुभूती आणि भक्तांची श्रद्धा यांचे संगम या कार्यक्रमात अनुभवायला मिळणार आहे.
‘एक शाम श्याम बाबा के नाम’ हा कार्यक्रम केवळ एक सांगीतिक सादरीकरण नसून, भक्ती, श्रद्धा, आणि भक्ताच्या भावनांचा सुंदर संगम आहे. या कार्यक्रमाचे आयोजन “करने वाले श्याम, करवाने वाले श्याम” यांनी केले असून या कार्यक्रमाच्या माध्यमातून समाजात भक्तिभाव जागृत करून एकात्मता आणि अध्यात्माची जाणीव निर्माण करणे, हा उद्देश ठेवण्यात आला आहे.
दरबारासाठी संपूर्ण परिसर आकर्षक रोषणाईने सजवण्यात येणार असून, कार्यक्रमस्थळी भाविकांसाठी उत्तम बैठक व्यवस्था केली जाणार आहे. महिला, वृद्ध, आणि लहान मुलांसाठी स्वतंत्र व्यवस्था ठेवण्यात आली असून, सर्वांनी परिवारासह उपस्थित राहावे, असे आवाहन आयोजकांनी केले आहे. या पवित्र दरबारात श्री श्याम बाबा व गणरायाची विशेष पूजा, आरती व कीर्तनाच्या माध्यमातून भक्तांना आध्यात्मिक समाधान लाभणार आहे. संपूर्ण खडके चाळ परिसरात या कार्यक्रमाची उत्सुकता शिगेला पोहोचली असून, शहर व परिसरातील श्याम भक्त मोठ्या संख्येने उपस्थित राहणार आहेत. या दरबारात सहभागी होऊन श्याम बाबांचे दर्शन, भक्तिगीते व दिव्य अनुभव घेण्यासाठी सर्व भाविकांना खुले आमंत्रण देण्यात आले आहे.
