जळगाव मिरर | २९ सप्टेंबर २०२५
जळगाव जिल्हा सामान्य रुग्णालयाच्या प्रसूतीगृहामध्ये सोमवारी, दिनांक २९ सप्टेंबर रोजी दुपारी शॉर्ट सर्किटमुळे अचानक आग लागल्याने एकच खळबळ उडाली. सुदैवाने, रुग्णालयातील कर्मचाऱ्यांनी दाखवलेल्या तत्परतेमुळे आणि त्वरित वापरलेल्या अग्निशमन यंत्रांच्या साहाय्याने ही आग काही मिनिटांतच आटोक्यात आणण्यात यश आले, आणि कोणतीही जीवितहानी झाली नाही.
मिळालेल्या माहितीनुसार, आग लागल्यानंतर प्रसूतीगृहातील विद्युत मीटर पूर्णतः जळून खाक झाले. त्यामुळे परिसरात धुराचे लोट व दुर्गंधी पसरली आणि वातावरणात घबराट निर्माण झाली. घटनेची माहिती मिळताच रुग्णालय प्रशासनाने प्रसूतीगृहात उपस्थित रुग्ण व त्यांच्या नातेवाईकांना तातडीने सुरक्षित स्थळी हलवले. कोणत्याही रुग्णाला इजा पोहोचलेली नाही, ही दिलासादायक बाब ठरली.
प्रसूतीगृहाचे अधिकारी तुषार पाटील यांनी सांगितले की, “घटनेनंतर विद्युतपुरवठा तात्पुरता खंडित करण्यात आला असून, आग केवळ मीटरपर्यंतच मर्यादित राहिल्यामुळे मोठ्या अनर्थापासून बचाव झाला.” या प्रकारानंतर रुग्णालयाच्या विद्युत यंत्रणेच्या सुरक्षेवर प्रश्नचिन्ह निर्माण झाले आहे. रुग्णालयासारख्या संवेदनशील ठिकाणी अशा घटना घडणे धोकादायक ठरू शकते, याची जाणीव अनेकांनी व्यक्त केली आहे. त्यामुळे यंत्रणेचे संपूर्ण विद्युत ऑडिट करून तात्काळ दुरुस्तीसाठी पावले उचलावीत, अशी मागणी कर्मचारी व नागरिकांकडून जोर धरू लागली आहे.
