जळगाव मिरर । १३ ऑक्टोबर २०२५
शहरातील रामेश्वर कॉलनी येथे दरवर्षी प्रमाणे यंदाही महर्षी वाल्मिकी जयंती मोठ्या श्रद्धा आणि उत्साहात साजरी करण्यात आली. दिनांक ११ ऑक्टोबर २०२५ रोजी रामेश्वर कॉलनी परिसरातील स्वामी समर्थ चौक येथून मिरवणूक काढण्यात आली. या उत्सवात कॉलनीतील नागरिकांचा उत्स्फूर्त सहभाग दिसून आला.
या वर्षीचा महोत्सव रामेश्वर कॉलनी वाल्मिकी जयंती महोत्सव समितीच्या नेतृत्वाखाली पार पडला. यावेळी वासुमित्रा फाउंडेशनचे अध्यक्ष भूषण भाऊ सोनवणे व समाज बांधव उपस्थित होते. तसेच एमआयडीसी पोलीस स्टेशनच्या गोपनीय शाखेचे पोलीस निरीक्षक आणि त्यांच्या सहकाऱ्यांनी सुरक्षिततेच्या दृष्टीने मोलाची साथ दिली. दुध विकास महासंघाचे संचालक अरविंद देशमुख यांचेही कार्यक्रमात अनमोल सहकार्य लाभले. महर्षी वाल्मिकी यांच्या कार्याचे स्मरण करत, त्यांचा संदेश समाजात पोहचवण्याचा प्रयत्न या उत्सवातून करण्यात आला. सामाजिक ऐक्य, बंधुभाव आणि समता या मूल्यांना उजाळा देणारा हा कार्यक्रम होता. स्थानिक नागरिकांच्या सहभागातून आणि त्यांच्या सहकार्यामुळे संपूर्ण परिसरात उत्सवमय वातावरण निर्माण झाले.
