जळगाव मिरर । १५ ऑक्टोबर २०२५
शहरातील खोटे नगरजवळ मंगळवारी रात्री ८ वाजेच्या सुमारास झालेल्या भीषण अपघातात भरधाव ट्रॅव्हल्सने दुचाकीला धडक दिल्याने दोन सख्खे भाऊ गंभीर जखमी झाले. जखमींपैकी एकाची प्रकृती चिंताजनक असल्याने त्याला अतिदक्षता विभागात दाखल करण्यात आले आहे.
सविस्तर वृत्त असे कि, निमखेडी येथील रहिवासी गणपत भिकन कुंभार (वय ३५) आणि त्यांचा लहान भाऊ अर्जुन कुंभार हे दोघे रात्री दुचाकीने निमखेडीकडून खोटेनगरच्या दिशेने जात होते. याचवेळी, हॉटेल राधिकाजवळ पाळधीकडून जळगावकडे येणाऱ्या एका भरधाव ट्रॅव्हल्सने त्यांच्या दुचाकीला धडक दिली. यात दुचाकीचा पूर्णपणे चक्काचूर झाला. यात दोन्ही भावंडे रस्त्यावर पडून गंभीर जखमी झाली. अपघात होताच परिसरातील नागरिकांनी तातडीने धाव घेतली आणि दोन्ही जखमींना उपचारासाठी जिल्हा सामान्य रुग्णालयात दाखल केले. या अपघातात गणपत कुंभार यांना गंभीर दुखापत झाली असून, त्यांच्यावर जिल्हा रुग्णालयाच्या अतिदक्षता विभागात उपचार सुरू आहेत. तर, त्यांचा लहान भाऊ अर्जुन कुंभार यांच्यावर किरकोळ दुखापतींवर उपचार सुरू आहेत.
