जळगाव मिरर | २७ ऑक्टोबर २०२५
राज्यातील महायुती सरकारमधील उपमुख्यमंत्री अजित पवार यांच्या नेतृत्वातील सत्ताधारी राष्ट्रवादी काँग्रेसच्या नागपूर येथील कार्यालयात चक्क लावणीचा कार्यक्रम घेण्यात आल्याचा प्रकार उजेडात आला आहे. यासंबंधीचा एक व्हिडिओ सोशल मीडियात चांगलाच व्हायरल झाला असून, त्यात एक महिला कार्यकर्ती लावणी सादर करताना दिसून येत आहे. याविषयी समाज माध्यमांत उलटसुलट चर्चा रंगली आहे.
अजित पवारांनी दोन महिन्यांपूर्वी नागपुरातील पक्ष कार्यालयाचे उद्घाटन केले होते. राष्ट्रवादीच्या नागपूर शहराध्यक्षांनी नुकताच या कार्यालयात दिवाळी मिलन कार्यक्रमाचे आयोजन केले होते. या कार्यक्रमात पक्षाच्याच एका महिला कार्यकर्तीने 2 गाण्यांवर लावणी सादर केल्याचा प्रकार घडला आहे. हा प्रकार घडला त्यावेळी पक्षाचे जिल्ह्यातील सर्वच प्रमुख नेते व कार्यकर्ते उपस्थित होते. त्यामुळे त्यांच्यावर टीकेची झोड उठली आहे. पक्ष कार्यालयात अशा प्रकारचे नृत्य सादर करणे कितपत योग्य आहे? असा प्रश्न या प्रकरणी उपस्थित केला जात आहे.
व्हायरल व्हिडिओत दिसून येत आहे की, राष्ट्रवादीची एक महिला कार्यकर्ती मला जाऊ द्या ना घरी वाजले की बारा या लावणीवर नृत्य सादर करत आहे. तिचे नृत्य पाहून उपस्थित दर्शक वन्स मोअरी मागणी करत आहेत. व्हिडिओत काही महिला कार्यकर्त्याही दिसून येत आहेत. त्या ही नृत्य सादर करणाऱ्या कार्यकर्तीला प्रोत्साहन देताना दिसून येत आहेत. पण आता याविषयी सोशल मीडियात उलटसुलट प्रतिक्रिया उमटत आहेत.
उल्लेखनीय बाब म्हणजे, अजित पवार यांच्या नेतृत्वातील राष्ट्रवादी काँग्रेस पक्ष नेहमीच कार्यक्षमता व कामाला प्राधान्य देणाऱ्या संस्कृतीसाठी ओळखला जातो. पण पक्षाच्या नागपूर येथील कार्यालयात एका कार्यकर्तीने लावणी सादर केल्याचा व्हिडिओ सोशल मीडियावर व्हायरल झाल्याने पक्षाच्या या प्रतिमेवर प्रश्नचिन्ह उपस्थित झाले आहे. कार्यस्थळ हे प्रामुख्याने पक्षाच्या ध्येयधोरणांवर काम करण्यासाठी व जनतेच्या समस्यांवर चर्चा करण्यासाठी असते. त्यामुळे त्या ठिकाणी लावणी सारखा कार्यक्रम आयोजित करणे हे पक्षाच्या गंभीर व कार्यक्षम प्रतिमेशी विसंगत वाटते.
