जळगाव मिरर | ३१ डिसेंबर २०२५
खान्देशातील नवउद्योजक, तरुण व महिलांच्या उद्योगस्वप्नांना बळ देण्यासाठी स्थापन करण्यात आलेल्या ‘खान्देश इन्क्युबेशन टेक्नॉलॉजी अँड आंत्रप्रेनरशिप फोरम’ (KITE) या खान्देशातील पहिल्या कम्युनिटी स्टार्टअप इन्क्युबेशन सेंटरचे उद्घाटन २८ डिसेंबर २०२४ रोजी जळगाव येथे उत्साहात पार पडले. के.सी.ई. इंजिनिअरिंग कॉलेजमध्ये झालेल्या या सोहळ्यात सॅटरडे क्लब ग्लोबल ट्रस्ट (मुंबई) चे चेअरमन अशोक दुगाडे प्रमुख अतिथी म्हणून उपस्थित होते.
उद्घाटनप्रसंगी बोलताना अशोक दुगाडे यांनी मराठी तरुणांनी नोकरीच्या मानसिकतेतून बाहेर पडून उद्योजकतेकडे वळावे, असे आवाहन केले. जळगाव किंवा धुळे इतक्यापुरतेच मर्यादित न राहता राज्य व देशपातळीवर आपला व्यवसाय विस्तारावा, असेही त्यांनी नमूद केले. कार्यक्रमाच्या अध्यक्षस्थानी कवयित्री बहिणाबाई चौधरी उत्तर महाराष्ट्र विद्यापीठाचे माजी प्र-कुलगुरू डॉ. पी. पी. माहुलीकर होते. अध्यक्षीय भाषणात त्यांनी ग्रामीण व आदिवासी भागातील उद्योजकतेवर भर देत, नवीन उद्योग हे शाश्वत, पर्यावरणपूरक आणि समाजोपयोगी असावेत, असे मत व्यक्त केले.
प्रास्ताविकात सागर पाटील यांनी स्पष्ट केले की, ‘काईट’ ही केवळ स्टार्टअप्ससाठीच नव्हे, तर सूक्ष्म, लघु व मध्यम उद्योजकांना (MSME) तांत्रिक व व्यावसायिक मार्गदर्शन देणारी कम्युनिटी-आधारित चळवळ आहे. डॉ. शांताराम बडगुजर यांनी ‘काईट’ हा समाजासाठी आणि समाजाने चालवलेला उपक्रम असल्याचे सांगितले.
कार्यक्रमात ‘काईट’च्या अधिकृत संकेतस्थळाचे उद्घाटन डॉ. भूषण चौधरी, डॉ. विकास गीते, डॉ. युवराज परदेशी व अजिंक्य तोतला यांच्या हस्ते करण्यात आले. तंत्रज्ञानाधारित स्टार्टअप्सना चालना देण्यासाठी ‘इलेक्ट्रोसॉफ्ट’ व ‘काईट’ यांच्यात सामंजस्य करार करण्यात आला. यावेळी इलेक्ट्रोसॉफ्टतर्फे निलेश वाघ व राजेश ठाकरे यांनी स्वाक्षरी केली. ‘काईट’च्या संचालक मंडळात डॉ. शांताराम बडगुजर, डॉ. युवराज परदेशी, सागर पाटील व ऋतगंधा देशमुख यांचा समावेश आहे. कार्यक्रमाचे सूत्रसंचालन धनंजय धनगर यांनी केले, तर डॉ. युवराज परदेशी यांनी आभार मानले. कार्यक्रमाच्या यशस्वीतेसाठी के.सी.ई. इंजिनिअरिंग कॉलेज, आयएमआर कॉलेज, अपेक्स स्टार्टअप ग्रुप, सॅटरडे क्लब ग्लोबल ट्रस्ट व काईट परिवाराने मोलाचे सहकार्य केले.
