मुक्ताईनगर प्रतिनिधी | प्रणित काठोके
जे.ई. स्कूल, मुक्ताईनगर येथे आदिशक्ती श्री संत मुक्ताई यांचा 747 वा जन्मोत्सव भक्तिमय वातावरणात उत्साहाने साजरा करण्यात आला. या कार्यक्रमात विद्यार्थ्यांनी उत्स्फूर्त सहभाग नोंदवत संत मुक्ताई यांच्या जीवनकार्याचे स्मरण केले आणि त्यांच्या विचारांचा जागर केला.
कार्यक्रमाच्या प्रारंभी कार्यक्रमाचे अध्यक्ष तथा विद्यालयाचे प्राचार्य व्ही.एम. चौधरी यांच्या हस्ते संत मुक्ताई यांच्या प्रतिमेचे पूजन करून पुष्पहार अर्पण करण्यात आला. याप्रसंगी विद्यार्थ्यांनी व उपस्थितांनी सामूहिकरीत्या मुक्ताई अष्टकाचे गायन करून संत मुक्ताई यांना अभिवादन केले. सामूहिक गायनामुळे कार्यक्रमाला भक्तिमय वातावरणाची अनुभूती आली.
कार्यक्रमाच्या अध्यक्षस्थानी प्राचार्य व्ही.एम. चौधरी होते. प्रमुख उपस्थितीमध्ये पर्यवेक्षक व्ही.डी. ब-हाटे, के.आर. कवळे आणि सांस्कृतिक मंडळाच्या अध्यक्षा सौ. आर.व्ही. महाजन मंचावर उपस्थित होते. कार्यक्रमाचे प्रास्ताविक व सूत्रसंचालन एस.बी. वंजारी यांनी केले. प्रास्ताविकातून त्यांनी भारतीय संतपरंपरेचे महत्त्व विशद करताना संतांनी समाजाला दिलेला भक्ती, ज्ञान, समता, बंधुभाव आणि मानवतेचा संदेश स्पष्ट केला. तसेच संत मुक्ताई यांच्या कार्यामुळे मुक्ताईनगरला प्राप्त झालेले ऐतिहासिक, धार्मिक व आध्यात्मिक महत्त्व अधोरेखित केले.
याप्रसंगी लक्ष्मी निंभोरे, नारायणी पाटील, पूजा भारुडकर, ईश्वरी पाटील, मोहिनी हरणे, द्विविजा डांगे, कुंती पाटील आणि जान्हवी पाटील या विद्यार्थिनींनी संत मुक्ताई यांच्या जीवनचरित्राचे प्रभावी वर्णन केले. संत मुक्ताईंचे बालपण, त्यांचे आध्यात्मिक सामर्थ्य, ज्ञाननिष्ठा, निर्भीड विचार आणि संतपरंपरेतील योगदान यांची माहिती विद्यार्थिनींनी आपल्या सादरीकरणातून मांडली. त्यांच्या सहभागामुळे विद्यार्थ्यांना संतसाहित्याची ओळख होण्याबरोबरच संतविचार समजून घेण्याची संधी मिळाली. शिक्षिका सौ. वाय.एस. पाटील यांनीही संत मुक्ताई यांच्या जीवनकार्याविषयी मार्गदर्शन केले.
अध्यक्षीय भाषणात प्राचार्य व्ही.एम. चौधरी यांनी संतविचारांचे महत्त्व विशद केले. संतांचे विचार समाजाला योग्य दिशा देणारे असून विद्यार्थ्यांनी संतांच्या जीवनातून प्रेरणा घेऊन सदाचार, नम्रता, समता आणि मानवतेची मूल्ये आपल्या जीवनात रुजवावीत, असे आवाहन त्यांनी केले. कार्यक्रमाच्या शेवटी संत मुक्ताई यांच्या ताटीच्या अभंगांचे वर्णन करुन सांस्कृतिक मंडळाच्या अध्यक्षा सौ. आर.व्ही. महाजन यांनी उपस्थितांचे आभार मानले. विद्यार्थ्यांच्या सक्रिय सहभागामुळे संत मुक्ताई यांच्या विचारांचा परिचय नव्या पिढीपर्यंत पोहोचला. संतपरंपरेचा वारसा जपण्याचा आणि संतांच्या शिकवणीचे महत्त्व जाणून घेण्याचा संदेश देत हा जन्मोत्सव उत्साहात संपन्न झाला.
सदर कार्यक्रमास सर्व शिक्षक , शिक्षकेतर कर्मचारी तसेच सर्व विद्यार्थी उपस्थित होते.
