जळगाव मिरर | २० जानेवारी २०२६
अमळनेर तालुक्यातील मुंगसे ते सावखेडा रस्त्यावर वाळूचा उपसा करण्यासाठी मजूर घेऊन जाणारे ट्रॅक्टर सोमवारी सकाळी उलटून झालेल्या अपघातात १५ मजूर जखमी झाले. जखमींवर धुळे येथील खासगी रुग्णालयात उपचार सुरू आहेत.
ही घटना सोमवारी सकाळी साडेआठ वाजेच्या सुमारास घडली. मुंगसे ते सावखेडा रस्त्यावरून जात असताना ट्रॅक्टर चालकाचे वाहनावरील नियंत्रण सुटल्याने ट्रॅक्टर उलटल्याची प्राथमिक माहिती आहे. अपघातानंतर तत्काळ १०८ अॅम्बुलन्सला कॉल करण्यात आला. मात्र, अॅम्बुलन्स तब्बल चार तास उशिरा घटनास्थळी पोहोचल्याने नातेवाईक व ग्रामस्थांनी तीव्र संताप व्यक्त केला. त्यामुळे जखमी मजुरांना खासगी वाहनांच्या मदतीने धुळे येथील खासगी दवाखान्यात दाखल करण्यात आले.
या अपघातात ज्ञानेश्वर भाईदास भील, राहुल तुकाराम भील, अजय बन्सी भील, लखन सुभाष भील, सुनील संभाजी भील, सुरेश रामदास भील, सागर शांताराम भील, विशाल विनोद भील, विशाल सुभाष भील, गोविंदा सखाराम भील, कृष्णा सुखदेव भील, जितेंद्र भाईदास भील, समाधान सुखदेव भील, सागर मंगल वाघ व विपुल बोरसे हे मजूर जखमी झाले आहेत.
दरम्यान, मुंगसे येथील तापी नदी पात्रातील वाळूचा लिलाव झाल्यामुळे मुंगसे ते सावखेडा रस्त्यावर वाळू वाहतूक करणाऱ्या वाहनांची वर्दळ मोठ्या प्रमाणात वाढली आहे. या रस्त्यावरून सुसाट वेगाने धावणाऱ्या वाहनांमुळे पायी जाणाऱ्या शालेय विद्यार्थ्यांच्या जीवाला धोका निर्माण झाला असून, पालकांनी ही वाहने नदीपात्रातून थेट सावखेडा पुलाकडे वळवण्याची मागणी केली आहे.
