जळगाव मिरर | २५ जानेवारी २०२६
पाळधी पोलीस व स्थानिक गुन्हे शाखेच्या संयुक्त कारवाईत प्रतिबंधित गुटख्याने भरलेला कंटेनर पाठलाग करून पकडण्यात आल्याने पाळधी परिसरात एकच खळबळ उडाली आहे. या कारवाईत तब्बल ७३ लाख २२ हजार २६४ रुपयांचा मुद्देमाल जप्त करण्यात आला असून एका संशयिताला ताब्यात घेण्यात आले आहे.
मिळालेल्या माहितीनुसार, आज दुपारी महामार्गावरून प्रतिबंधित गुटख्याची वाहतूक करणारा कंटेनर जाणार असल्याची माहिती पाळधी पोलीस व स्थानिक गुन्हे शाखेला मिळाली. त्यानुसार पाळत ठेवण्यात आली. कंटेनर येताच पोलिसांनी त्याला थांबवण्याचा इशारा दिला. मात्र चालकाने न थांबता कंटेनर पुढे नेल्याने पोलिसांनी पाठलाग सुरू केला. अखेर एरंडोल तालुक्यातील सावदे शिवारात हा कंटेनर पकडण्यात यश आले.
त्यानंतर कंटेनर ताब्यात घेऊन पाळधी पोलीस चौकीत आणण्यात आला. तपासणीदरम्यान कंटेनरमध्ये प्रतिबंधित गुटखा असल्याचे आढळून आले. यानंतर अन्न सुरक्षा अधिकारी शरद पवार यांना पाचारण करून पंचनामा करण्यात आला. पंचनाम्यात १२८ गोण्या प्रतिबंधित गुटखा आढळून आला असून त्याची अंदाजे किंमत ४८ लाख २२ हजार २६४ रुपये आहे. यासह सुमारे २५ लाख रुपये किमतीचा कंटेनर असा एकूण ७३ लाख २२ हजार २६४ रुपयांचा मुद्देमाल जप्त करण्यात आला आहे. या प्रकरणात संशयित प्रदीप भाटू पाटील (वय ४९) याला ताब्यात घेण्यात आले असून पुढील तपास सुरू आहे.
ही कारवाई पाळधी पोलीस चौकीचे सहायक पोलीस निरीक्षक प्रशांत कंडारे, सहाय्यक पोलीस उपनिरीक्षक राजाराम सुरवाडे, योगेश सोनवणे, वसंत निकम, संदीप खंडारे, रवींद्र चौधरी, मोहन पाटील, रमेश सूर्यवंशी, भारत पाटील तसेच स्थानिक गुन्हे शाखेचे पोलीस उपनिरीक्षक शरद बागल, सहाय्यक पोलीस उपनिरीक्षक अतूल वंजारी, विजय पाटील, अक्रम शेख, रवी कापडणे यांच्या पथकाने केली. या वेळी धरणगावचे पोलीस निरीक्षक सुनील पवार यांनी घटनास्थळी भेट देऊन पाहणी केली.
पाळधी पोलीस ठाण्याच्या हद्दीत प्रथमच इतक्या मोठ्या प्रमाणावर गुटख्याची कारवाई झाल्याने परिसरात खळबळ उडाली असून, कारवाई होताच पाळधी परिसरातील अवैध धंदे तत्काळ बंद पडल्याचे चित्र पाहायला मिळाले.
